Өткен аптада Семей қаласының әкімі Нұрымбет Сақтағановтың қатысуымен қалалық мәслихаттың кезектен тыс бесінші сессиясы өткен еді. Отырыс барысында төрт мәселе қаралды. Алғашқы үшеуі қалалық комиссиялардың құрамы жөнінде болса, ал төртіншісі жаңадан бой көтерген Қарағайлы ықшам ауданындағы даңғылға Тұңғыш Президенттің есімін беру жайлы болды.
Тоқтала кетсек, аталмыш даңғыл Қарағайлы ауданындағы Семей — Павлодар автожолынан бастау алады. Бойында көптеген қоғамдық орындар мен нысандар орын тепкен кең де әдемі көше. Даңғылдың сол жағында көп салалы мәдени-спорт кешені, Назарбаев Зияткерлік мектебі, ал оң жағында жаңадан тұрғызылған кө пқабатты тұрғын үйлер мен сәулетті балабақша орналасқан. Көлік нөпірі де мол, жүргіншілері де көп.
Төртінші мәселе бойынша қала әкімі сөз сөйлеп, өзінің пікірін білдіріп өтті.
— Болашақта Қарағайлы ықшам ауданынан Мұз сарайын, білім және технологиялар трансфері мектебін ашу жоспарлануда. Бірнеше функционалдық аймақтар, серуендеу аймақтары, қоғамдық тамақтану орындары, балаларға арналған ойын және спорт алаңдары жасақталатын болады. Көшелерді жарықтандыру, орындықтар, қоқыс жәшіктерін және шағын сәулет нысандарын орнату қарастырылған, — деді Семей қаласының әкімі Нұрымбет Сақтағанов.
Бұл көшенің осыған дейін атауы болған жоқ. Жалпы сипаттай кетсек, «қызыл» сызықтағы ені 40 метрді құраса, бүгінде жалпы ұзындығы 950 метрді құрайды. Ал оның бойындағы құрылысты ескерсек, ұзындығы екі шақырымнан асады екен.
Қалалық мәслихат сессиясында депутаттар көшеге Нұрсұлтан Назарбаев есімін беру туралы ұсынысты бір ауыздан қолдап, шешімді бекітті. Енді Қарағайлыдағы жаңа көшеге атау беру туралы түпкілікті шешімді республикалық ономастикалық комиссия қабылдайтын болады.
«СТ» — ақпарат{jcomments off}
