Бүгінгі таңда елімізде сыбайлас жемқорлық фактілерінің алдын алу ісі маңызды шаралар қатарында тұр. Осыған орай, өңіріміздегі көптеген мекемелерде ел Президенті Қасым-Жомарт Тоқаевтың Жолдауынан туындайтын сыбайлас жемқорлыққа қарсы күреске бағытталған тың тапсырмаларды жүзеге асыру мақсатында тиімді жұмыстар жүргізіліп жатыр. Мәселен, жуырда Семейдегі көлік қызметкерлеріне арналған жиын болып өтті. Басқосуға Қазақстан Республикасы Сыбайлас жемқорлыққа қарсы іс-қимыл агенттігінің ШҚО бойынша департаментінің бас маманы Гүлнар Бекбаева арнайы қатысып, кең көлемде баяндама жасады.
Алғашқы болып сөз алған Семей жүк тасымалы бөлімшесінің директоры Сиязбек Әліпбайұлы 2021 — 2022 жылдар бойынша жемқорлықпен күрес жүргізудің іс-шаралары және Сыбайластық фактілерінің алдын алу бойынша қабылданған жол картасы жөнінде айтты. Өз сөзінде бөлімше басшысы алдын алу шаралары сыбайлас жемқорлыққа қарсы қызметтің басым бағыттарының бірі болып табылатынын атап өтті. Бұл орайда Индустрия және инфрақұрылымдық даму министрлігі тарапынан тұрмыстық сыбайлас жемқорлықты жою бойынша Жол картасы әзірленген болатын. Аталмыш тарапта қазіргі таңда бірқатар жұмыстар жүргізіліп жатыр. Соның ішінде бірінші кезекте сыбайлас жемқорлық тәуекелдерін болдырмауға күш салынуда.
Соның нәтижесінде қазіргі күндері заңсыз іс-әрекеттер біршама азайған. Сиязбек Әліпбайұлы сыбайлас жемқорлыққа қатысты келеңсіздіктерге жол бермеу үшін қолға алынған кешенді іс-шараларға тоқталып, сөз кезегін Қазақстан Республикасы Сыбайлас жемқорлыққа қарсы іс-қимыл агенттігінің ШҚО бойынша департаментінің бас маманы Гүлнар Бекбаеваға берді.
Гүлнар Айтқұрманқызы сыбайлас жемқорлық фактілерінің алдын алуға байланысты жүргізіліп жатқан шаралар жайлы айта келіп, заңнамадағы өзгерістерге тоқталды. Мәселен, мекеме басшысының қол астындағы қызметкерлері жемқорлық қылмыс жасаса, бірінші басшы орнынан кете ме, әлде тәртіптік жауапкершілікке тартыла ма деген сауал төңірегінде ой өрбітті. Сонымен қатар сыбайлас жемқорлық фактілері бойынша хабарлаған адамдарға сыйақы беру жайлы да айтып өтіп, биылғы жылы мұндай сыйлық көлемі 12 млн теңгеге дейін ұлғайғанын, хабарлаған адамның құпиялылығы сақталатынын жеткізді. Бұл орайда тәулік бойы қоңырау қабылдайтын 14/24 қауырт желісі жұмыс істеп тұрғанын да айтып, егер де жемқорлықпен, пара талап етумен бетпе-бет келген қызметкер болса, міндетті түрде хабарласуын өтінді.
— Сол тәрізді осыған дейін мемлекеттік қызметшілер мен оларға теңестірілген тұлғаларға 2 айлық есептік көрсеткішке дейін сыйлық алуға рұқсат берілсе, өткен жылдан бастап бұл шешім күшін толықтай жойды. Яғни, кез келген сыйлық параға жатқызылады, — деп нақтылап өтті Гүлнар Айтқұрманқызы.
Жиын барысында сонымен қатар қозғалып отырған тақырып аясында қатысушылар тарапынан сұрақтар да қойылып, бас маман тұшымды жауаптар берді. Бұл ретте құқық қорғау органдары тарапынан жасалынатын жемқорлықпен байланысты арандатушылық әрекеттер, пара беруге итермелеу, т.б. мәселелер жайлы кең көлемде талқыға түсті.
Әлібек КЕМЕЛХАН, «Семей таңы»{jcomments off}
