28 ақпан күні Семей қаласының әкімі Нұрымбет Сақтағанов мекеме басшыларымен бірге бірнеше нысанды аралады. Бұл туралы шаһар басшысы өзінің Instagram әлеуметтік желісіндегі парақшасында жазды.
Шаһар басшысы Нұрымбет Сақтағанов алдымен Семейдегі Орталық саябаққа бас сұқты. Қала әкімі нысанда атқарылған жұмыстармен танысып, анықталған кемшіліктерді жою туралы тапсырма берді. Сәуір айында саябақтағы жөндеу жұмыстары өз жалғасын таппақ және ағымдағы жылдың 1 маусымына дейін аяқталады деп жоспарлануда. Орталық саябақты қалпына келтіру жұмыстары 2019 жылы басталған болатын.
Қаланың орталық бөлігіндегі проблемалы аумақтардың бірі — Дулатов көшесі, дәлірек айтсақ, мәселе жолдың сапасына қатысты. Бүгінде аталған көшеде сумен жабдықтау желілерін қайта құру жобасы жүзеге асырылуда. Мердігермен келісімшарт 2021 жылдың 1 маусымына дейін жасалған.
«Ылғал мен қардың жылдам еруінің салдарынан жол асты топырақтардың шөгуі орын алуда. Аталған мәселені шешу мақсатында кепілдік міндеттемелерге сәйкес, жол үстін толтыру және грейдерлеу жұмыстары жүргізілетін болады. Жолдың үстіңгі қабатын толық қалпына келтіру, келісімшарттық міндеттемелерге сәйкес, ағымдағы жылдың мамыр айында жүзеге асырылады. Бұл мәселе қатаң бақылауда», — деп жазды Нұрымбет Аманұлы.
Өткен жылы Әуезов даңғылы бойында сумен жабдықтау желілерін қайта құру жұмыстары жүргізілген болатын. Сол себепті даңғылдағы жолдың жекелеген учаскелерінде асфальтталған жол жамылғысының бұзылғанын байқауға болады. Бұл өз кезегінде көлік құралдарының жүруіне қолайсыздық тудыруда. Қазіргі уақытта жолдың беткі қабатын толтыру жұмыстары басталды. Сонымен бірге көктем — жаз мезгілінде, кепілдік міндеттемелерге сәйкес, асфальт жабындысы бұзылған жерлер қалпына келтіріледі.
«Құрметті жерлестер! Кей жерлерде жаяу жүргіншілердің қозғалысын қиындатқан еріген судың жинақталуы бойынша мәселелер пысықталуда. Туындаған қолайсыздықтар үшін кешірім сұраймыз. Коммуналдық қызметтер тәулік бойы жұмыс істейді, сіздердің барлық сын-ескертпелеріңіз алдағы жұмысымызда ескерілетін болады», — деп жазды қала басшысы Н.Сақтағанов әлеуметтік желідегі парақшасында.
Айтолқын САМАТОВА, «Семей таңы»{jcomments off}
