Семейдегі қоғамдық көліктердің жетпіс пайызға жуығына иелік етіп отырған «Semeybus» ЖШС автобус паркі қаржылық қиындықтарға тап болды. Бұл туралы аталған парк директоры Болат Қылышбеков баспасөз конференциясында мәлімдеді.
Автобус паркі директоры Болат Ақылжанұлының сөзінше, кредиторлардың бірі 70 млн қарызы үшін «Semeybus» жауапкершілігі шектеулі серіктестігін сотқа берген. Сонымен қатар «Қазақстан Даму Банкі – лизинг» акционерлік қоғамына берешегі 1,3 млрд теңгені құрап отыр.
— Бүгінгі күні «Semeybus» автобус паркінің жағдайы қиын. Берешегіміз 2 млрд 100 миллион теңгеге жетті. Оның 1,3 млрд теңгесі – «Қазақстан Даму Банкі –лизинг» АҚ қарызы. Автобустардың лизингке алынғанын білесіздер. Қалғаны салық төлемдері, жұмысшылардың зейнетақы және әлеуметтік аударымдары, кредитке алынған техникаға қажетті бөлшектердің шығыны, — деді Б.Қылышбеков.
Баспаөз конференциясына қатысқан Семей қалалық жолаушылар көлігі және автомобиль жолдары бөлімі басшысы Серікқали Жұмановтың айтуынша, өткен жылдың наурыз айында басталған карантин шаралары қаладағы автобус парктерінің жағдайын нашарлатқан.
— Қазіргі күні Семейдегі үш тасымалдаушы компанияның шығындары анықталды. Электронды билет арқылы біз олардың кірісі мен шығынын анық бақылай аламыз. Өздеріңіз білесіздер, карантиндік шаралар кезінде қоғамдық көліктер жұмысын тоқтатып, компаниялар шығынға ұшырады. Өткен жылдың қараша айында ШҚО мәслихаты Семейдегі автобус парктерін әлеуметтік жағынан әлсіз деп танып, субсидия бөлу мәселесі көтерілді. Жергілікті әкімдік қаңтар айынан бері Семейдегі барлық тасымалдаушыларға қолдау көрсетіп келеді. Облыстық мәслихат қаулысымен, қазір біз тегін немесе жеңілдікпен жүретін жолаушылардың шығындарын өтеп отырмыз. Бұл бағытта 370 млн теңге бөлінген, — деді С.Жұманов.
Бөлім басшысының айтуынша, қалалық бюджеттен «Semeybus» автобус паркіне 500 млн теңге субсидия беріледі. Сонымен қатар сәуір айының ортасында облыстық бюджеттен де қаржы бөлінбек. Қазір облыстық бюджетке Семейдегі жолаушылар тасымалымен айналысатын – «Semeybus», «Семей автобус паркі» және «Таксоматорный парк» ЖШС үшін 3 жылға 13 млрд теңгеге субсидия бөлуге өтінім жіберілген. Соның ішінде «Semeybus» автопаркіне бір жылға 3,5 млрд теңге қажет.
— Келесі аптада қалалық мәслихаттың кезектен тыс сессиясы өтіп, 500 млн теңге қаржы бөлінеді. Дегенмен субсидия бөлінген кезде, келісімшартқа сәйкес, маршруттағы барлық автобус желіге шығуы қажет. Егер бір автобус шықпай қалса, келісімшарт талаптары бұзылып, субсидия берілмейді, — деді С.Жұманов.
Ал «Semeybus» ЖШС автобус паркі директорының айтуынша, бүгінгі күні автопарктегі 170 автобустың 70-і бұзылып тұр.
— Автопаркте 60 кіші, 80 орта, 30 үлкен класты автобус бар. Қазір 70 автобус сынып тұр. Кіші класты автобустарды жөндеу оңай және олардың бөлшектерін де тез табуға болады. Ал орта және үлкен класты автобус саймандарын шетелден алдырамыз. Бұл ұзақ уақытты алады, — дейді Б.Қылышбеков. — Біз қанша тасымал жасасақ, соған орай субсидия аламыз. Құжат бойынша автопарк жылына 57 млн адам тасымалдайды. Бірақ шын мәнінде автопарк бір жылда 21 млн адам тасымалдаған. Автопарктің күндік табысы 4,5-5,5 млн теңгені құраса, оның ішінде 2,5 млн теңге жанар-жағармайға кетеді. Қазір біз бір адамды 80 теңгеге емес, 190 теңгеге тасымалдап отырмыз. Шын мәнінде субсидия автопаркке емес, жолаушыларға бөлінеді, — деді Болат Қылышбеков.
Автопарк басшысы, егер субсидия бөлінбесе, тариф бағасы көтерілуі мүмкін екенін жеткізді.
Жадыра ТӨЛЕГЕНҚЫЗЫ, «Семей таңы»{jcomments off}
