Жуырда Абай музейінде «Мейірімділік керуені» республикалық байқауының жеңімпаздары мен қатысушыларын марапаттау рәсімі өтті. Үздіктердің кейбірі Дариға Назарбаеваның қолы қойылған дипломдарға ие болды.
Абайдың әдеби-мемориалдық музейінде «Мейірімділік керуені» республикалық байқауының жеңімпаздары мен қатысушыларын марапаттау рәсімі өтті. Байқау ҚР Тұңғыш Президенті — Елбасы қоры, Қазақстанның іскер әйелдер қауымдастығы және «Дегдар» гуманитарлық қорының бастамасымен ұйымдастырылған.
— Бүгін біз барлық санитарлық-гигиеналық нормаларды сақтай отырып, осы шараны өткізуді маңызды деп санадық. Тәуелсіздігіміздің 30 жылдық мерейтойы аясында адамдарға сөзбен ғана емес, іс жүзінде көмектесіп, жүрек жылуын сыйлап жүрген мейірімді жандарды марапаттағымыз келеді. Олардың көмегі әсіресе пандемия кезінде, қазақстандықтар коронавирустық инфекциямен күресіп жатқанда қатты байқалды,- деді Семей қаласы әкімінің орынбасары Айдар Садырбаев.
Семейдегі Қазақстан іскер әйелдер қауымдастығының төрағасы Шолпан Чегедекованың айтуынша, биыл байқауға еліміздің облыстары, соның ішінде Шығыс Қазақстан облысы да алғаш рет қатысты.
— Тұңғыш Президент қоры мен Қазақстанның іскер әйелдер қауымдастығының қолдауымен қайырымдылықпен айналысатын жандар арасында «Мейірімділік керуені» байқауы өтті. Байқаудың мақсаты – қайырымды жандарды көпшілікке насихаттау. Байқау бес аталым бойынша өтті. Биылғы жылы байқауға қалалар ғана емес, облыстар да қатысты. Біз әкімдіктермен бірге жұмыс істедік. Барлық өтініштер жиналып, республикаға жіберілді. Жалпы республика бойынша 700-ге жуық өтінім берілді. Семей қаласы бойынша екі адам — Арай Мандиева мен Абылайхан Асылбай бірінші орынды жеңіп алды, — деді Шолпан Чегедекова.
Байқау лауреаттары алдымен Алматыда салтанатты түрде марапатталды. Жеңімпаздарды Дариға Назарбаева жеке құттықтады. Әр аталым бойынша үш сыйлық беріліп, жеңімпаздар ақшалай сыйлықтарға ие болды.
Семейде жеңімпаздарға сертификаттар мен Абайдың кітаптары табыс етілді.
Айтолқын САМАТОВА, «Семей таңы»{jcomments off}
