Шығыс Қазақстан облысының әкімі Даниал Ахметов жуырда өткен облыс әкімдігінің отырысында қала және аудан әкімдеріне жол жөндеу жұмыстарының сапасын мұқият қадағалауды тапсырды. Себебі Өскемен мен Семей қалалары тұрғындары тарапынан жол мәселесіне қатысты шағымдар көп түседі. Сонымен қатар республикалық комиссияның зертханалық тексеру нәтижелерінде көрсетілген кемшіліктер де бар. Екі қаланың әкімдеріне және басқарма басшысына тиісті органдарды тарта отырып, жүзеге асырылатын жұмыстардың сапасын қосымша тексеруді қамтамасыз ету, сондай-ақ кепілдік мерзімі бар, бұған дейін қолданысқа енгізілген учаскелерді тағы бір мәрте тексеру тапсырылды. Сондай-ақ аяқталуы 2021 жылға жоспарланған барлық нысандарды уақытында пайдалануға беруді қамтамасыз ету қажеттілігі де ескертілді.
Биыл облыстық және аудандық маңызы бар жолдардан жалпы ұзындығы 137 км-ді құрайтын тоғыз учаскені жөндеу жоспарланған, оның ішінде 86 шақырымы – облыстық, 51 шақырымы – аудандық маңызы бар жолдар. Бұдан басқа, қалалар мен аудандардың 200 км болатын көше-жол желісіне жөндеу жүргізілмек. Сондай-ақ қазіргі таңда Семей қаласында автожол көпірін қайта жаңартуға жобалық-сметалық құжаттама әзірленген. Қазіргі уақытта жоба мемлекеттік сараптамадан өтуде.
«Биыл Өскемен және Семей қалалары мен Шемонаиха ауданының айналма жолдарының ЖСҚ дайындау жұмыстарын аяқтау қажет. Семей қаласындағы әуежайды жаңарту жұмыстары аяқталды. Биыл Өскемен және Үржар ауданының әуежайлары қайта жөндеуден өтеді. Катонқарағай ауданында да бұл бағыттағы жұмыстарды бастау жоспары бар. Ел Президенті Қасым-Жомарт Кемелұлы Тоқаевтың қолдауымен Бұқтырма су қоймасы арқылы өтетін көпірдің құрылысы басталды. Осылайша, 2022 жылдың соңына қарай біз барлық негізгі инфрақұрылымдық міндеттерді орындауға тиіспіз», – деп жазды облыс әкімі Даниал Ахметов өзінің әлеуметтік желідегі жеке парақшасында.
Жол – облыс тамыры. Жол жөнделсе, жол төңірегіндегі түйткілді мәселелердің түйіні шешілері сөзсіз. Осы ретте әкімдер жұмыс сапасын қатаң қадағалаулары керек. Сонымен қатар барлық жүзеге асырылатын жобалардың сапасына объективті және адал бақылау болуы тиіс.
Абылай МАҚСҰТБЕК, «Семей таңы»
