Денсаулық сақтау министрі Алексей Цой бұрынғы министр Елжан Біртановқа қатысты сұраққа жауап берді.
21 сәуір күні сот Елжан Біртановтың үй қамағын ұзартса да, оған үйден жұмыс істеу мақсатында шығуына рұқсат еткен еді. Бұған дейін оған отбасы мен қорғаушысынан басқа жандармен араласуға тыйым салынған болатын.
«Елжан Біртановқа қатысты сұрағым бар еді. Сот Елжан Біртановқа үйден шығып, жұмыс істеуге рұқсат етті. Оны денсаулық сақтау министрлігіне немесе жедел жәрдемге қабылдайсыздар ма?», — деп сұрады журналист Алексей Цойдан.
Бұл сұраққа Алексей Цой: «Қазіргі таңда біздің қолымызда да осы ақпарат бар. Біздің білуімізше ол қазір коммерциялық құрылымда жұмыс істеп жүр», — деп жауап берді.
Еске сала кетейік, 26 сәуірде Алексей Цойға коронавирусқа қарсы QazVac вакцинасы егілді.
