Қазақтан шыққан тұңғыш Олимпиада чемпионы Жақсылық Үшкемпіровтің есімі әрбір қазақтың жүрегінде қалатыны анық. Себебі ол — көзі тірісінде Олимпиада чемпионы ретінде ғана емес, адамдық келбетімен де халқының құрметіне бөленген тұлға.
Жақсылық Үшкемпіровтің замандасы, белгілі спорт журналисі, Қазақстанның еңбек сіңірген қайраткері Несіп Жүнісбаевтың «Қазақ қоғамы кімнен айырылғанын білесіздер ме? Білемін дейсіздер, әрине. Күрестен Олимпиада чемпионынан, әлем чемпионынан, Қазақстанның Еңбек ерінен айырылдық дерсіздер. Қате жоқ. Бірақ бұлар Жақсылықтың ту сыртынан жазылған, әркім оқи алатын атақ-даңқтары ғана. Бір жапырақ қана батыр жігіттің Отан үшін, ел үшін, ұлт үшін қажет, санасаң санына жетпес ұлы қасиеттерінің бәрі оның табиғатына жататын. Жақсылық – сөз бен істің адамы еді, екеуін де ар-ұятпен орындайтын! Жақсылық – мақсат қоя білу мен соған жету жолын өз қолымен салып көрсеткен феномен! Жақсылық чемпион болуды ғана емес, чемпион өзін қалай ұстауы керек екенін тұтас қазақ қоғамына сабақ ретінде көрсеткен ұстаз!» деуі оның адамдық қасиеттеріне берілген шынайы баға деп білеміз.
Өткен жылы, Тәуелсіздік күні қарсаңында, Көкпекті ауданында жаңадан салынған спорт кешенінде даңқты балуанның құрметіне арналып футбол чемпионаты бастау алған болатын. Төрт айға созылған бұл спорттық сайыста ауданның кілең мықтылары жиналған «Көкпекті», «Аманат», «Дос» құрама командалары, Үлкенбөкен ауылының, Тассай ауылының, Жақия Шайжүнісов атындағы орта мектептің, Көкпекті орта мектебінің, спорт кешенінің құрама командалары үзбей ойын көрсетті. 20 сәуір күні чемпионат мәресіне жетіп, үздік командалар анықталды.
Жақсылық Үшкемпіров атындағы аудандық футзал чемпионатының жабылу рәсіміне даңқты балуанның көзін көрген аға буын өкілдері — Жақсылық ағаның досы Қайыртай Молғаждарұлы және шәкірттері Нұрлан Алтынбекұлы мен Самат Аймуханұлы, сондай-ақ спортшыларға демеушілік көрсеткен Жақсылық ағаның бауыры, ауданымыздағы спорт жанашыры Болат Миғражұлы Бекпердинов қатысты.
Салтанатты шарада аудан әкімінің орынбасары Марат Теміржанов сөз алып, үздік ойын көрсеткен құрама командалардың ойыншыларына өз алғысын білдірді.
— Биыл әйгілі спортшы Жақсылық Үшкемпіров, тірі болса, жетпіс жасқа толар еді. Футзал чемпионаты Жақсылық ағаның құрметіне ұйымдастырылып, оның мерейтойы қарсаңында мәресіне жетіп отыр. Атақты ағамыздың құрметіне арналған сайыс алғаш рет Көкпекті ауданында өтті. Сол үшін аудан әкімі Раджан Қайрқанұлы мен барша футбол командаларының ойыншыларына шынайы алғысымды білдіргім келеді,- деді Нұрлан Алтынбекұлы.
Сонымен, Жақсылық Үшкемпіров атындағы чемпионат қорытындысы қандай болды? Тартысты өткен сайыста сегіз құрама командалар арасында үздік ойын өрнегін көрсеткен «Көкпекті» құрамасы жеңіс тұғырынан көрінді, ал екінші орынды «Аманат» құрамасы, үшінші орынды Көкпекті орта мектебі ойыншылары қанжығаларына байлап, медальдармен марапатталды.
Біз, қазақ, қай кезде болмасын, жақсы адамды үлгі тұтып, көкке көтеріп, қошемет көрсететін халықпыз. Жақсылық аға тірі кезінде сондай құрмет-қошеметке ие болды. Оның өмір жолы қазіргі және келер ұрпаққа үлгі-өнеге болып қала бермек. Балуанның құрметіне арналған спорттық шараны алғаш рет Көкпекті ауданы өткізіп отыр. Алдағы уақытта мұндай сайыстар ел көлемінде жалғасын табатыны анық. Мәңгілік сапарға аттанған даңқты балуанның жақсы аты туған халқы барда өшпек емес.
Барша аудан тұрғындары атынан осындай жауапты іс-шараны ұйымдастыруға бастамашы болып, абыроймен өткізген жасөспірімдер және балалар спорт мектебінің директоры Аслан Танысбаевқа және «Жұлдыз» газетінің бас редакторы Дархан Бердібекке алғысымызды білдіреміз.
Аяжан АМАНТАЙҚЫЗЫ, «Семей таңы»
