Иә, сол бір естен кетпес сұрапыл жылдардың артта қалғанына да 76 жыл өтіпті. 76 жыл бұрын адамзат тарихындағы ең бір қанды қырғын – Ұлы Отан соғысы сол кездегі КСРО-ның жеңісімен аяқталды. Отаны үшін, ұрпағы үшін жанын берген батырларға, бейбіт өмір үшін күресіп, еліне тыныштық сыйлаған ардагерлерге тағзым етіп, құрмет көрсету, олардың ерлігін жас ұрпаққа насихаттау — басты парызымыз.
Мереке қарсаңында аудан әкімі Сейілбек Абұйырұлы аягөздік Ұлы Отан соғысының ардагері Смағұлов Қабден Хасенұлының шаңырағына арнайы барып, амандық сұрап, қарт жауынгердің батасын алып, пікірін, тілегін тыңдап қайтты.
Жеңіс күнін Чехияның Прага қаласында қарсы алған Қабден Хасенұлы 1945 жылы туған жеріне аман-есен оралып, ұзақ жылдар бойы ұстаздық қызмет атқарған екен.
Сол бір сұрапыл жылдары өз еркімен майданға сұранып, соғысқа аттанғанда небары 19 жаста болған жауынгер бүгінде 99 жастың қырқасына көтеріліп отыр. Өмірі аңызға бергісіз Қабден ата 1941 — 1942 жылдары Мәскеу түбіндегі Волоколам тас жолындағы шайқасқа, одан әрі Польшаны азат етуге қатысып, екі рет жараланыпты. Ардагер соғыс жылдары жайлы әңгімелей отырып, майдан даласында бірге шайқасқан қаруластарын еске алды. Қос жанары көрмей қалғанымен, санасы сергек, көкірегі сайрап тұр.
— Бейбіт күнде өмір сүріп жатқан бүгінгі ұрпақ, тәуелсіз мемлекетіміздің әрбір азаматы сіздерді әрқашан да құрмет тұтамыз. Ел Президенті Қасым-Жомарт Тоқаев, облыс әкімі Даниал Ахметов ардагерлерімізді қай уақытта да ардақтап, олардың жанқиярлық ерліктерін ұмытпай, құрмет көрсетуді міндеттеп отырады. Бізге бейбіт өмір сыйлаған соғыс ардагерлері барлық қошеметке лайық. Отан қорғау жолында қан кешкен аталарымыздың ерлігіне бас иеміз, — дейді бұл орайда аягөздік жастар.
— Аудан басшылары да, жастар да арнайы келіп, құттықтап тұрады. Атқарылып жатқан игі шаралар мен нәтижелі жұмыстар жайында естіп, біліп отырмын. Президентіміз Қасым-Жомарт Кемелұлының жүргізіп отырған саясаты, нәтижелі бастамалары мен еліміздегі оңды өзгерістер жайлы теледидардан тыңдап отырамын. Облыс әкімі Даниал Кенжетайұлының атқарған жұмыстарын да білемін. Ел игілігі жолындағы еңбектері еселене берсін. Осы күнге аман — есен жеткізгені үшін Жаратушымызға сансыз шүкірлер айтамын. Құдайдың берген жасын жасай береміз ғой. Ең бастысы, ел сенім артқан ер-азаматтар аман болсын. Барлықтарыңа бақыт тілеймін! – деп ақжарма тілегін білдіріп, батасын береді ақсақал амандық сұрай келген жандарға риза пейілмен.
Елі үшін етігімен қан кешкен майдангерлер бүгінгі бейбіт күнді бізге тарту етті. Қазіргі таңда санаулы ғана қалған соғыстың соңғы солдаттарына құрмет көрсету, олардың ерлігіне тағзым ету – бүгінгі ұрпақтың парызы. Әлбетте, Отанын жаудан қорғау жолында жастығын сарп етіп, елдің ертеңі үшін ештеңеден тайынбаған майдангерлерге қандай құрмет көрсетсек те орынды.
Қатары сиреп бара жатқан ардагерлеріміз, соғыстың куәгерлері ортамызда аман-есен жүре берсін.
Әлібек Кемелхан, «Семей таңы»
