Айналайын, зайсандық ағайын, Шаймардан, Ноғайбай, Арғынбек деген кім? Осы аттас көшелер кімнің құрметіне аталғанын білесіздер ме? Өтініш!!! Білетіндер болса, білмейтіндерге түсіндіре кетіңіздеріші! Бізді де ұмытпаңыздар!
Сонымен, газетіміздің өткен санында Зайсан қаласындағы қанішер Кондюрин көшесінің атын ауыстыру жайлы жазылған болатын. Жазыла–жазыла жауыр, айтыла-айтыла ақжем болып кеткен тақырып… Алайда билік елең етпегенімен, халық үнсіз қалмады. Кеше редакцияға Зайсандағы түсініксіз көше атаулары жайлы телефон соғып, тіпті ватсап желісіне суретін салған оқырман саны өте көп болды.
Бірі: «Біздің Зайсанда Шаймардан атты көше бар. Алайда бұл көше кімнің құрметіне берілгенін ешкім білмейді. Көнекөз қариялардан сұрасақ, бірі: «Алаш ардақтысы Шаймардан Тоқжігітовтің құрметіне аталған болар»,- деген жорамал айтса, ал енді бірі: «Қарабұлақ совхозында Шаймардан Мұқанов атты орденді шопан болған, сол кісінің есімі берілген…»- дейді. «Кезінде аудандық ішкі істер бөлімінде бастық болып, зейнет демалысына шыққан Зайсан ауданының Құрметті азаматы, бұл күндері арамызда жүрген Шаймардан Оралбаевтың атымен аталған шығар…»- деп тұспал жасағандар да болды.
Көше аттарын өздеріне жақындатып жүрген бұдан басқа да Шаймардан атты марқұмдардың ұрпақтары Зайсанда аз емес сияқты. Осы көшенің аты қай Шаймарданға арналғанын газет арқылы ажыратып беруді сұрап, өтінішпен шыққан азаматтан кейін байланысқа шыққан тағы бір зайсандық: «Ноғайбай, Арғынбек, Глухово атты көшелер бар. Бұл адамдардың тегі көрсетілмегендіктен кім екендігін біле алмай-ақ қойдық,- десе,
«Зайсанда халқымыздың даңқты батыры Бауыржан Момышұлы құрметіне аталған, үйлердің реттік саны 18 санымен ғана аяқталатын шолақ көше бар. Кондюрин атымен аталған көшемен салыстыруға келмейді. Кондюрин Бауыржан Момышұлына қарап сақ-сақ күліп, мазақ етіп тұрғандай көрінеді. Осыны қаперіне алатын басшының жоқтығы қынжылтады», — деген оқырманымыз дұрыс жазылмаған көше тақтайшалардың бірнешеуін суретке түсіріп, ватсапқа салып жіберіпті. Мысалы, «Тәуелсіздік Қазақстан» деп жазылған тақтайшадан не ұқтыңыздар? Көшенің аты не Тәуелсіздік, не Қазақстан болар… Әлде Тәуелсіз Қазақстан ба екен?..
Көшесінің атауынан-ақ елдегі азаматтардың өткенге құрметі мен болашаққа жанашырлығын аңғаруға болады. Себебі көше атауы — тарихтан шыр шертетін бірден-бір белгі. Көше аттары түсінікті әрі қатесіз жазылып тұрса, біз де бұл тақырыпты көтермес едік-ау…
Ендеше, Зайсан ауданының әкімдігі осы тақырыпқа байланысты не дер екен?
Риза МОЛДАШЕВА
