Өткен жұмада «Семей — Адалдық алаңы» жобалық кеңсесінің жетекшісі Дариға Дайырова Семей қаласының №2 халыққа қызмет көрсету орталығының жұмысына мониторинг жүргізді.
Халыққа қызмет көрсету орталығының басты міндеті — барлық стандарттарға сәйкес халыққа сапалы түрде қызмет көрсету. Осы орайда «Семей — Адалдық алаңы» жобалық кеңсесінің жетекшісі, қалалық мәслихат депутаты Дариға Дайырова Семей қаласының №2 халыққа қызмет көрсету орталығының жұмысымен танысты.
Бақылау барысында аталған мекемеде тұрғындардың көп шоғырлануы байқалмады. Мекеме басшысының міндетін атқарушы Марлен Нысанбаев қызмет көрсету үрдісі санитарлық талаптарға сай жүргізілетінін атап өтіп, Дариға Абайқызын орталықтың жұмысымен, жаңашылдықтармен таныстырды.
— Семей қаласының Халыққа қызмет көрсету орталықтары ШҚО Бас санитар дәрігерінің қаулысы бойынша, сағат 9.00-ден 18.00-ге дейін жұмыс істейді. Орталыққа келер алдында 1414 қысқа нөміріне қоңырау шалу немесе біздің Telegram бот арқылы кезекке бронь алу керек. Сонымен қатар белгіленген уақыттан 15 минут бұрын келген дұрыс. Өздеріңізге белгілі, мұнда барлық қажетті қызметтер көрсетіледі. Тұрғындар қызметтердің 80% -ын өзіне-өзі қызмет көрсету бөлімі немесе электронды цифрлы қолтаңба арқылы үйде отырып ала алады. Қазір жер қатынастарына байланысты құжаттарды да орталыққа келмей-ақ, қашықтан алуға болады, — деді Марлен Нысанбаев.
Қала тұрғындары қазір ХҚКО-дан қызмет алу бұрынғымен салыстырғанда оңай әрі жылдам екенін айтады.
— Еліміздегі шектеу шараларына байланысты халыққа қызмет көрсету орталықтарында бір жылдай болмадым. Бүгін мекеменің санитарлық талаптарды, әлеуметтік арақашықтықты сақтай отырып жұмыс істейтінін көріп, қуанып қалдым. Бұрынғыдай ығы-жығы халық жоқ. Алдын ала бронь алу арқылы кезегім де тез келді, жұмысымды жылдам аяқтадым. Ал бұрын қандай да бір қызмет алу ұзақ уақытқа созылатын. Эпидемиологиялық жағдай тұрақталған соң да осы қалыпта жұмыс істейді деген ойдамын,- дейді қала тұрғыны Арнұр Мырзақасимов.
Мониторинг барысында орталықтағы мүмкіндігі шектеулі жандарға арналған пандус белгіленген талапқа сәйкес келмейтіні анықталды. Бұл мәселеге қатысты «Семей — Адалдық алаңы» жобалық кеңсесінің жетекшісі Дариға Дайырова ескерту жасап, жедел түрде қалпына келтіру керектігін тапсырды.
— «Семей – адалдық алаңы» жобасы аясында бүгін Семей қаласының №2 халыққа қызмет көрсету орталығының жұмысына, қызмет сапасына қоғамдық бақылау жүргіздік. Жаңа өздеріңіз көргендей, пандус стандартқа сәйкес келмеді. Қазір құжаттары әзірленіп жатыр екен. Бұл мәселе біздің бақылауымызда болады. Далада кезек күткен адам санының көп болмауы, тұрғындардың алдын ала бронь алуы – мұның бәрі орталықтың жұмысы бірізге түсіп келе жатқанын көрсетеді. Дегенмен қызметтердің 80 пайызы электрондық форматқа көшсе де, тұрғындар бұрынғыдай мекемеге келіп үйреніп қалған. Халықпен жұмыс істеген оңай емес. Сондықтан сала мамандарына алғысымды білдіремін, — деді Дариға Дайырова.
Іс-шара соңында Дариға Дайрова ХҚКО қызметкерлерін адалдыққа, парасаттылыққа, сыбайлас жемқорлықтан ада болуға, мемлекетіміз бен азаматтардың мүддесіне сай сапалы қызмет етуге шақырды.
Жадыра ТӨЛЕГЕНҚЫЗЫ, «Семей таңы»
