Семей қаласының бүгінгі тыныс-тіршілігіне қатысты БАҚ құралдары мен әлеуметтік желіде жарық көріп жатқан жарияланымдар әр түрлі ойларға жетелейді… Александр Блоктың сөзімен айтқанда, тыныштық тек түсімізге енетін болды («Покой нам только снится»).
Биағамыздың, Бейімбет Майлиннің сөзімен айтқанда, даудың басы Дайрабайдың қай көк сиырынан басталды? Жыл басында Семейде жолаушылар тасымалы мен жылу, тұрмыстық қалдықтар мәселесіне байланысты шу болды. Бұл кеше мен бүгін туындаған әңгіме емес, бұрын да болған, алдағы уақытта да болады. Жиналмай қалған қоқыс, жылынбай қалған үй, аялдамада түнеп қалған халық жоқ… Мәселенің барлығы бюджеттен бөлінетін қаржының күшімен шешіліп жүр. Қанша қаржы бөлінсе де жетпейді… Осы «жетпейді» бір топ депутаттың ҚР Президентіне хат жазуына себеп болды.
Мемлекет басшысының өзіне!!! Басты тақырып — АҚША БЕРМЕЙДІ!
Алайда өздерінің талаптарының орынды екендігін дәлелдеп жатқан олар жоқ. «Егер бермесеңдар, Президентке жазамыз!» деген қорқыту мен үркіту…
Semey Bus ЖШС айналасында талай әңгіме айтылып жатыр. Соңғы үш ай уақыттан бері көпшілік жеке бастарының мүддесін қорғаған топтың әр түрлі әңгімесін тыңдаудан жалыға да бастады. Аталған мәселені үлкен драмаға айналдырып отырған кәсіпкерлер өздерінің лас ойындарына автобус жүргізушілері мен кондукторларды да тарта бастады. Проблема көп. ММСҚ, зейнетақы қоры, еңбекақының мезгілінде төленбеуі т.т. Қарапайым халыққа барлығына билік кінәлі деп ақталып жүргендер өздерінің кемшіліктерін өзгелерге аударуда… Ақиқатты соттан іздеуден басқа амал қалған жоқ…
Жылу. Семей қаласы үшін ең маңызды тақырып! Биліктің беделін түсіру үшін бұдан асқан тақырып болмаса керек. ЖЭО-3 құрылысы неге басталмай жатыр, инвесторларға неге жер бөлінбеді деген әңгіменің тереңіне бойлап жатқандар аз… Жоғарғы сот үлкен көлемде алынатын несиеге жерді кепілдікке қоймақшы болған күмәнді топқа қарсылық танытқан биліктің қадамын қолдады.
Тұрмыстық қатты қалдықтар — жауыр болған тақырып. Қоқыстың жиналмауына біресе қажетті техникалардың жоқтығын сылтау етсе, ал енді бірде келісімшартқа қол қоймаған тұрғындарды, тіпті қоқыстың шашылып қалуына қаңғыбас иттер мен адамдарды кінәлаумен келе жатқан бұл қызметтің мәселесіне нүкте қойылар емес… Келісімшартқа қол қоймаған қала тұрғындары сапалы қызмет талап еткендері үшін айыпты ма?!
Семейдегі жол мәселесі — сақалды тақырып. Жол жөндеуге ақша бөлінудей–ақ бөлініп жатыр. Кәсіпорындар конкурс арқылы миллиардтаған тапсырысты ұтып алуда. Жыл сайын қанша көлемде жолдардың жөнделгені жайлы есеп берілуде. Алайда тақырып күн тәртібінен түскен емес. Неге биыл жөнделген жолдар келесі жылы жарамсыз болып қалады? Себеп не? Әлде сапаның төмендігі мен ұйымдастыру жұмысының әлсіздігінен бе?
Көгалдандыру жұмысына байланысты проблемаларды жіпке тізбей-ақ қоялық… Барлығы жоспарлы, алынған міндеттеме аясында шешілуге тиісті мәселелер. Конкурсты ұтып алған кәсіпорындар өздеріне алған міндеттемелерін орындаулары керек.
Бүгін сөз қылған тақырыптарға жауапты — «Гордорстрой» ЖШС және басқа да кәсіпорындар меншігі болып саналатын Әйкелевтер жанұясы мен сол жанұяның командасы, олардың достары. Олардың билікте де, депутаттар қатарында да, әр түрлі партияларда да өз адамдары бар. Соңғы кездері қоғамның белсенді тобын да өздеріне тарта бастағандары байқалады. Қоғам белсенділері мен депутаттар жағдайды өршітіп, әлеуметтік желі арқылы әділдік іздеп, «жанайқайларын» жеткізуде. Бұлар шын мәнінде қарапайым халықтың қамын ойлап отыр ма, қалай ойлайсыздар? Олардың негізгі мақсаттары — бюджет қаржысын көбіреп қармап қалу.
Өзіміздің жеке пікірімізге Сіздерді тәуелді ету мақсатын көздеп отырған жоқпыз, құрметті оқырман! Жағдайды түсіндіру — біздің міндетіміз, ал қорытынды жасау өз еріктеріңізде. Сырттай бақылай отырып, біздің түйген ойымыз — кәсіпкерлердің қалтасы толған үстіне тола түсу керек сияқты.
Ал әзірше тыныштық түсімізге ғана кіріп тұр…
Р. Маулханқызы
