Апта дүйсенбісінде қаламыздағы көрнекті ғалым, абайтанушы Қайым Мұхамедхановтың мемориалды кешенінде саяси қуғын-сүргін және ашаршылық құрбандарын еске алу шарасы өтті. Шараға зиялы қауым өкілдері, қоғам белсенділері мен жастар, әйгілі тұлғаның ұрпақтары қатысты.
Санитарлық талаптар сақтала отырып өткізілген жиында қала әкімі Нұрымбет Сақтағанов сөз алып, пікірін білдірді.
— Ардақты ағайын, қадірменді қауым! Бүгін біз барлығымыз саяси қуғын-сүргін және ашаршылық құрбандарын еске алу үшін жиналып отырмыз. Қазақ елі қаншама қиын кезеңдерді бастан өткерді. Ұлт ретінде жер бетінен жойылып кетуге де шақ қалды. Сондай оқиғалардың бірі — өткен ғасырдың 1928-1933 жылдарындағы ашаршылық. Ал 1937 — 38 жылдары 100 мыңнан аса адам репрессияға ұшырап, 25 мыңнан астамы атылды. Қуғын-сүргінге ұшырағандар асылдарымыз еді. Көзі ашық, көкірегі ояу алаштың ардақтылары еді. Егемендік алғаннан кейін 1995 жылы Елбасының Жарлығымен 31 мамыр саяси қуғын-сүргін құрбандарын еске алу күні болып жарияланды. Өткен жылы ғана еліміздің Президенті Қасым-Жомарт Тоқаевтың Жарлығымен мемлекеттік комиссия құрылды. Аталған комиссия бүгінгі таңда облыс, қала деңгейінде үлкен жұмыстар жүргізіп жатыр. Бастысы, біз өткен күннен қандай сабақ алдық, соны зерделеуіміз керек. Мұның барлығы Тәуелсіздігіміздің қандай жолмен келгенін жастарға түсіндіру үшін қажет. Еліміздің егемендігін сақтап қалу — баршамыздың ортақ парызымыз. Ал өз өмірлерін еліміздің болашағы үшін құрбан еткен азаматтарды әрдайым еске алып, оларға тағзым ету — әрқайсымыздың азаматтық борышымыз. «Біріңді, қазақ, бірің дос көрмесең, істің бәрі бос» деп Абай айтқандай, біздің алдымызда Тәуелсіздігімізді нығайту жолында бір жеңнен қол, бір жағадан бас шығара отырып еңбек ете беру міндеті тұр, — деді Н.Аманұлы.
Шара барысында Қайым Мұхамедхановтың шәкірті, республикалық «Абай» қорының президенті Отантай Кәріпжанов сөз алып, ұстазының өнегесі мен тағылымға толы өмірі жайында айтып өтті.
Ал студент жастар мен шаһардағы ақындар орталығының шәкірттері саяси қуғын-сүргін құрбандарына арнап патриоттық рухтағы өлеңдерін оқыды.
Әлібек КЕМЕЛХАН, «Семей таңы»
