Маусым айының 1-күні облыс әкімі Ахметов Даниал Кенжетайұлы жұмыс сапарымен Абай еліне келді. Облыс әкімі бірден аймақта қызу қарқын алған «Бір қабатты Шығыс» бағдарламасы шеңберінде Абай саябағы аумағында салынып жатқан жаңа тұрғын үйлер құрылысының барысын көруден бастады.
Мұндай іргелі жұмыстарда босаңсуға, ұсақ-түйекке мүлдем орын жоқ. Сондықтан аудан әкімі Байсабыров Жарқынбек Борашұлы осы шағын ықшам ауданда бой көтеріп келе жатқан бірыңғай сәулеттік келбетке ие тұрғын үйлердің құрылысының жай-жапсарын, жұмыстардың сапалы атқарылуын егжей-тегжейіне дейін қатаң бақылауда ұстап келеді.
Облыс әкімі Даниал Кенжетайұлы қос пәтерлі тұрғын үйлерге кіріп, ондағы құрылыстың көлемі, тұрғын үйдің жобасы, құрылыс сапасына назар аударып, жұмыстардың ойдағыдай жүргізіліп жатқандығына ризашылық білдіріп: «Әлеуметтік маңызы бар бұл тұрғын үйлер Тәуелсіздігіміздің мерейлі 30 жылдығы қарсаңында тұрғын үйге мұқтаж жандарға берілуі қажет»,- деп атап өтті.
«Бір қабатты Шығыс» аймақтық бағдарламасы ауданымызға үлкен өзгерістер әкелді. Жағымды жаңалықтардың жаршысы бола білді. Осы бағдарламаның аясында аудан орталығы көркем келбетке ие болды. Былтырғы жылы қос пәтерлі 16 тұрғын үй салынып, көпбалалы және әлеуметтік жағынан аз қамтылған 32 отбасы баспаналы болды.
Ұлы Абай елінде өткен мерейтой жылы қыруар жұмыстар жасалды. Қайталап айтар болсақ, ұлы ақын туған Сырт Қасқабұлақ, Ақшоқыда Құнанбай қорымы жаңарып, музей салынды. Қарауылда жаңа мектеп бой көтерді. Дәл осы Қарауылдағыдай жаңа үлгіде салынған Абай саябағы сынды саябақ өзге өңірлерде жоқ деуге болады. Бұл саябақ қарауылдықтардың, келген қонақтардың нағыз демалыс орнына айналып келеді.
Келесі кезекте облыс басшысы ауыл тұрғындарын, қонақтарды күн сайын көркімен, теңдессіз әсемдігімен баураған дәл осы Абай саябағына келіп, ондағы көгалдандыру, абаттандыру жұмысымен танысып, егілген ағаштардың жайқалып, гүлзарлардың жайнап тұрғанын көріп, нысанды күтіп ұстау бағытында атқарылып жатқан жұмыстарға оң бағасын берді. Аймақ басшысының тікелей қолдауымен былтырғы жылы салынған бұл саябақтың ішінде серуен құрушылардың да саны күн санап артып келеді. Келген қонақтардың да оң бағасын алып үлгерді. Саябақ ауласында мәдени-рухани шаралар өткізетін орын, балардың ойын алаңы, тұрғындар үшін серуен құратын жолдар, велосипед жолдары т.б. қамтылған.
Шындығына келгенде, бұл жұмыстардың барлығы ұлылар мекенінің болашағы үшін, тұрғындар мен өсіп келе жатқан ұрпақ қамы үшін жасалып жатыр. Адамзатқа алыптарды тарту еткен киелі мекен көш басында тұруы тиіс. Облыс басшысы тарапынан жыл сайын қасиетті мекенді қолдау лайықты түрде жалғасын тауып келеді. Тағылымы мол игілікті шаралар одан әрі жалғасын таба береді деп сенеміз.
Әсет МЕДЕУХАНҰЛЫ, Абай ауданы
