Халықаралық балаларды қоғау күнінде Семей қаласының әкімі халықаралық және республикалық зияткерлік олимпиадалардың, спорттық сайыстардың және шығармашылық конкурстардың жеңімпаздарымен кездесті.
Биылғы оқу жылында семейлік оқушылар әр түрлі білім және спорт жарыстарында үлкен нәтижелерге қол жеткізді. Білім сайыстарының қорытындысы бойынша Семей қаласы 1-ші орынға ие болды.
Кездесу барысында Нұрымбет Аманұлы дарынды оқушыларды мерекелерімен құттықтап, облыс әкімінің алғыс хаттары мен сыйлықтарын табыс етті.
— Биыл Семей қаласы облыс көлемінде түрлі білім сайыстарының қорытындысы бойынша 1-ші орынды иеленіп отыр. Бұл өздеріңіздей жас өрендердің және шәкірттеріне сапалы білім мен тәлім-тәрбие беріп, ізгілікке баулыған ұстаздардың арқасы. Осы жетістіктеріңіз үшін ұстаздар қауымы мен сіздерге алғысымызды айтамыз. Алар асуларыңыз көп болсын! Біз де сіздердей бала болдық. Сіздер сияқты жақсылыққа ұмтылып, қиял-ғажайып әлемге сапар шектік. Үлкендерді сыйлап, кішілерге ізет көрсетіп, жақсы оқуға, жақсы тәлім-тәрбие алуға тырыстық. Өсе келе мектептегі жылдар адам өміріндегі ең бақытты кезең екенін түсіндік. Сондықтан әр күндеріңізді тиімді пайдаланып, жазғы демалыстарыңызды сәтті өткізулеріңізге тілектеспін. Келер жылы да жас жеткіншектеріміз бізді қуанта беретіндеріне сенімдіміз!– деп жылы лебізін білдірді Нұрымбет Аманұлы.
Кездесу барысында марапатқа ие болған 35 оқушының 10–ы — Шәкәрім атындағы үш тілде оқытатын көп бейінді гимназияның оқушылары. Бәрі де халықаралық білім сайыстары мен зияткерлік олимпиадалардың жүлдегерлері.
— Ғылыми жобалар сайысында алтын медальды жеңіп алған шәкіртіміз Нұрбек Жанатбек облыс әкімінің дарынды оқушылармен кездесуіне қатысып, Даниал Кенжетайұлының арнайы сыйлығына ие болып қайтты. Жалпы, біздің мектептен ғылыми жобалар сайысына 28 оқушы қатысып, оның 17-сі жүлдегер атанды. Жеңімпаздарымыз бен жүлдегерлерімізге, Білім және ғылым министрлігінің Құрмет грамоталарымен қоса, күміс, қола және алтын мелальдар табыс етілді. Алтын медаль еншілеген шәкірттеріміздің ата-аналарына Білім және ғылым министрі Асхат Аймағанбетовтің алғыс хаты табысталды. Осындай құрметке оқушыларымызбен бірге мұғалімдеріміз де лайықты деп санаймыз. Мұндай марапатқа ие болу — оқушы үшін үлкен жетістік, – деді жиында сөз алған Шәкәрім атындағы үш тілде оқытатын көпбейінді гимназияның директоры Алма Әубәкірова.
Марапаттау рәсімінде қала әкімі Нұрымбет Сақтағанов жеңімпаз оқушыларға облыс әкімінің алғыс хаттары мен арнайы сыйлықтарын — планшеттер мен Smart сағаттар табыс етті.
Абылай МАҚСҰТБЕК, «Семей таңы»
