4 маусым ҚР мемлекеттік рәміздері күні Тұңғыш Президент – Елбасы кітапханасында аталған кітапхананың және Нұрсұлтан Назарбаев қорының ұйымдастыруымен ел тәуелсіздігінің 30 жылдығына арналған «Біз – ел патриотымыз» атты халықаралық жастар форумы өтті. Форумға 8 елдің өкілдері қатысты. Жиынға бейнеконференция режимінде облыс әкімі Даниал Ахметов пен шығысқазақстандық жастар да қосылды. Халықаралық форумда Елбасы – Тұңғыш Президент Нұрсұлтан Назарбаев жастарды құттықтап, оларға арнап үндеу жолдады.
Форумға Франция, АҚШ, Түркия, Әзірбайжан, Қырғызстан, Белоруссия мен Ресейдің жастар ұйымдарының көшбасшылары, жергілікті мемлекеттік органдарда жұмыс істейтін жастар, мәслихат пен ҚР Парламентінің жас депутаттары, «Болашақ» бағдарламасының түлектері, «Қазақстанның 100 жаңа есімі» жобасының қатысушылары, жас ғалымдар мен кәсіпкерлер, шығармашыл азаматтар қатысты.
Форум Оpen space форматында ұйымдастырылды. Шараның мақсаты – бүгінгі жаһандану заманындағы жастардың рөлін анықтау, әлеуметтік белсенді, креативті ұрпақ қалыптастыру және халықаралық жастар ұйымдарымен тығыз байланыс орнату.
Форумға қосылған облыс әкімі Даниал Ахметов қазіргі күні елімізде жастардың сапалы білім алып, қалаған ісімен айналысуларына толық мүмкіндігі бар екенін атап өтті.
— Тәуелсіздіктің мерейтойлық жылында біз Тұңғыш Президент Нұрсұлтан Әбішұлы Назарбаевтың жаңа Қазақстанның қалыптасуына қосқан зор үлесін ерекше атап өтуіміз керек. Елбасының саяси ерік-жігерінің арқасында «Бір ел – бір тағдыр» ұранымен Қазақстанның көпұлтты халқын біріктірген жаңа егемен мемлекет құрылды. Қазір жастарға сапалы білім алуға, сүйікті ісімен айналысуға, өз армандарын жүзеге асыруға барлық мүмкіндіктер бар.
Болашақ мамандықтарына бағдарлау және жоғары білімнің қолжетімділігін арттыру – жас ұрпақтың бәсекеге қабілеттілігін еселейтін нақты қадамдар. Бұл мақсатта облысымызда «Білікті маман» өңірлік жобасы іске асырылуда. Жоба шеңберінде сұранысқа ие мамандықтар бойынша республиканың жеті жоғары оқу орнында Шығыс Қазақстан облысының жастары білім алуда,- деді Даниал Ахметов.
Аймақ басшысының айтуынша, техникалық және кәсіптік білім беру жүйесін дамытуға бағытталған «Жас маман» бағдарламасы бойынша облыс колледждерінде WorldSkills халықаралық талаптарына сай жабдықталған 5 құзыреттілік орталық ашылған. Шығысқазақстандық жастар өздеріне берілген мүмкіндіктерді сәтті пайдаланып, түрлі олимпиадалар мен шығармашылық байқауларда, спорттық жарыстарда топ жарып жүр. «100 жаңа есім» жобасы қолға алынғалы 18 шығысқазақстандық жоба жеңімпазы атанған.
— Бұл – егемен елдің жастарының жарқын жеңісі. Президенттік Жастар кадрлық резервіне 6 жерлесіміз өтті. Былтыр өткен Еріктілер жылында «Біз біргеміз» акциясы аясында 7 мыңнан астам волонтер қарт адамдар мен әлеуметтік осал топтарға көмек көрсетуге қатысты. Биыл жастар «Игі істер марафоны» республикалық акциясы аясында бұл жақсы дәстүрлерді жалғастыруда,- деді Даниал Ахметов.
— Жастар – еліміздің бәсекеге қабілеттілігінің негізгі көрсеткіші. Біз өзге де елдердің көшбасшы жастар ұйымдарымен тығыз қарым-қатынас жасау арқылы Қазақстанның гүлденуіне үлесімізді қосамыз. Мемлекеттік рәміздер күніне орай өткізіліп отырған форумның патриоттық мәні өте зор. Ресей, Франция, АҚШ, Түркия, Қырғызстан, Әзербайжан және Белоруссия жастарымен тәжірибе алмасу арқылы жаңа мүмкіндіктерге қол жеткіземіз,– дейді «Jas Otan» Жастар қанатының облыстық филиалының төрағасы, Өскемен қалалық мәслихатының депутаты Алмас Айтмұқаш.
Айтолқын САМАТОВА, «Семей таңы»
