Елдегі карантин режимін қасақана бұзғандарға әкімшілік жауапкершілік енгізілді. Айыппұл 87 510 теңгені құрайды.
Денсаулық сақтау министрлігі КВИ-мен ауырғандарды және олармен байланыста болғандарды оқшаулау үшін арнайы санитарлық ережелерді бекітті. Осы талаптарды орындамағаны үшін әкімшілік жаза қарастырылып отыр.
Бұл ережелер 2021 жылдың 10 маусымында күшіне енеді. Өзін-өзі оқшаулау режимін бұзушылар Ashyq ақпараттық платформасының көмегімен анықталады. Олар Ashyq жобасына қатысатын мемлекеттік нысандарға барған кезде «қызыл» мәртебеге ие болады.
«Карантиндегі науқас адам санитарлық-эпидемиологиялық талаптарды сақтамаса, Әкімшілік кодекстің 802-бабы бойынша әкімшілік құқық бұзушылық туралы іс қозғалып, оған қатысты әкімшілік жаза қолданылады. Егер азамат өзінің әлеуметтік мәртебесі туралы біле тұра, өзін-өзі оқшаулау режимін бұзып, қасақана басқаларға жұқтыру қаупін тудырса, оған 30 АЕК немесе 87 510 теңге мөлшерінде әкімшілік айыппұл тағайындалады», — деп хабарлайды Санитарлық-эпидемиологиялық бақылау комитетінің баспасөз қызметі.
Ashyq платформасының деректері цифрлық даму, инновация және аэроғарыш өнеркәсібі министрлігінің бірыңғай ақпараттық жүйесінде жазылады. Соңғы мәліметтерге сәйкес, Ashyq жобасы іске қосылғаннан бастап ПТР тесті оң нәтиже көрсеткен 3556 азамат және байланыста болған 3012 адам анықталған.
