Қазақстан — жас ұлтты мемлекет. Бүгінгі таңда 14 пен 29 жас аралығындағы 3,8 миллион жас азамат бар, олар халықтың 21%-ын құрайды. Республикадағы жастардың үлесі әлемдегі орташа көрсеткішпен салыстырғанда әлдеқайда жоғары. Сондықтан Қазақстан үшін жастар саясатын жүргізу негізгі басымдықтардың біріне айналды. Елбасы, «Nur Otan» партиясының Төрағасы Нұрсұлтан Назарбаев және Қазақстан Республикасының Президенті Қасым-Жомарт Тоқаев жастар мәселесін дер кезінде шешу мен қолдаудың маңыздылығын атап, оларға әрдайым ерекше көңіл бөліп келеді.
«Nur Otan» партиясының «Jas Otan» жастар қанаты еліміздегі барлық санаттағы жастардың мүддесін білдіретін, 20 жылдық тарихы бар ең ірі жастар ұйымы. «Jas Otan» студент, ғалым, шығармашыл, жұмысшы, кәсіпкер, ауыл және қала жастарының мүдделерін қорғай отырып, оларға бағдарлама аясында нақты даму жолдарын ұсынады.
«Jas Otan» жастар қанатының Семей қалалық бөлімшесінің жетекшісі Темірлан Мақсатұлы Бақтияровпен сұхаттасқан едік.
— Темірлан Мақсатұлы «Jas Otan» жастар қанатының астына біріккен ерікті жастардың пандемия кезіндегі еңбегін оқырман жақсы біледі. Алдымен семейлік ерікті жастарымыздың карантин уақытда атқарған еңбектеріне тоқтала кетсеңіз?
— «Jas Otan» – өз қатарына 105 мыңнан астам жас азаматты біріктірген, еліміздегі ең ірі жастар ұйымы. Еліміздің барлық 17 аймағында филиалы бар бірден-бір жастар бірлестігі. Республиканың қалалары мен аудандарында, ірі кәсіпорындар мен жоғары оқу орындарында «Jas Otan»-ның 534 бөлімшесі жүйелі жұмыс жасайды. Соның бірі Семей қаласындағы бөлімшесі.
«Jas Otan» – Отанымыздың гүлденуі үшін күш біріктіруге ынталы еліміздің жас азаматтарына берілген мүмкіндік. Біздің елімізде жастардың білім алуына, еңбек етуіне, өзін дамытуына тең мүмкіндіктер берілген. Жасотандықтар ұстанатын құндылықтар Қазақстан жастарына ортақ. Адамдарға қамқорлық жасау, құқықтары мен бостандықтарын сақтау, конституциялық құқықтарын қорғау – біздің ұйымның да басты ұраны. Азаматтық танытып, өзгенің басына түскен қиындыққа бей-жай қарамау, әрбір адамға көмек беруге дайын болу – мемлекетіміздің, қоғамымыздың өркендеуінің негізі деп білеміз.
«Jas Otan» жастар қанатының Семей қалалық бөлімшесінде бүгінгі күні өз еріктерімен 2000-ға жуық волонтер тіркелген. Соның ішінде 500-ге жуығы бізбен бірге жұмыс істеуде. Пандемия басталғалы бері олар көпбалалы және әлеуметтік аз қамтылған бес мың отбасыға азық-түлік пакеттерін таратты. «Жақыныңа жанашыр бол» акциясы аясында жалғызбасты қарттар мен зейнеткерлерге, халықтың осал топтарына 2000 маска мен 2000 антисептик үлестірдік.
Жасыратыны жоқ, пандемия бізге дәрігерлердің қадірін түсіндірді. «Дәрігерлерге алғыс» акциясы шеңберінде індетпен алғы шепте күресіп, өмірлерін қатерге тіккен 100 дәрігерге иммунитет көтеретін азық-түліктер мен сусындар, дәрумендер тараттық. Осының бәріне қаламыздың кәсіпкерлері, мәслихат депуттары және «Nur Otan» партиясы демеушілік көрсеткенін айта кеткен жөн.
Шектеу шаралары кезінде ойын-сауық орталықтары, түнгі клубтар, ресторандар жасырын түрде жұмысын жалғастырып жатты. Біздің еріктілер қалалық полиция басқармасымен бірге түнгі рейдтерге шығып, ереже бұзушыларды анықтауға жәрдемдесіп отырды.
Бұл игі істердің барлығына қаламыздағы жоғарғы оқу орындары мен колледждеріндегі «Jas Otan» жастар қанатының өкілдері де өз үлестерін қосты.
— «Jas Otan» жастар қанатының Семей қалалық бөлімшесі жастар саясатын іске асыруға қандай үлес қосуда?
— 2015 жылы Қазақстан Республикасының «Мемлекеттік жастар саясаты туралы» жаңа Заңы қабылданып, мемлекеттік жастар саясатын қалыптастыру мен іске асыру бойынша нақты тетіктер қалыптасты. ҚР Ақпарат және қоғамдық даму министрлігінің құрылымында Жастар және отбасы істері жөніндегі комитет қызмет етеді, сондай-ақ елдің барлық аймақтарында жастар саясаты мәселелері жөніндегі басқармалар жұмыс істейді. Жыл сайын жастар мәселелерінің негізгі салаларындағы жағдайға жан-жақты талдау жүргізілетін «Қазақстан жастары» Ұлттық баяндамасы әзірленеді. Қазақстандағы жастар саясатының жүйелі дамуына қуатты серпін берген «Jas Otan» Жастар қанатының 2020 2025 жылдарға арналған «Жастар-Отанға!» Жастардың жетістік жолы» бағдарламасы қабылданды.
«Jas Otan» жастар қанаты жеті негізгі қағиданы берік ұстанады: Адамгершілік пен жауапкершілік; Тарихты, мәдениетті және дәстүрді құрметтеу; Оқу және тұлғалық даму; Салауатты өмір салты; Қоршаған ортаға қамқорлық жасау; Белсенді азаматтық ұстаным; Құқық бұзушылық пен сыбайлас жемқорлыққа қарсы «нөлдік төзімділік».
Өздеріңіз білесіздер, карантин уақытында оқу қашықтан ұйымдастырылып, барлық орталықтар жабылып, тіпті көшеде жүруге тиым салынды. Осы кезеңде «Ozger» республикалық марафоны бастау алып, Семей қаласының жастарын да қамтыды. Акцияның мақсаты жастардың бойында кітап оқу, сортпен шұғылдану, қайырымдылықпен айналысу, қоршаған ортаны қорғау, медитация жасау секілді 10 жаңа дағды қалыптастыру болатын. Семейлік жастар да осы акцияға қатынасып, тұлғалық дамуға жол ашты деп ойлаймын.
Бұдан бөлек, «Ардагерлерді ардақтайық» республикалық акциясы аясында еріктілеріміз жалғызбасты қарттар мен зейнеткердің үйлеріне барып, ауласын қардан тазартып беруді жақсы дәстүрге айналдырды.
Жылда өтетін «Кел, шай ішейік» акциясы аясында, кәсіпкерлер мен жолда жұмыс істейтін азаматарымызға ыстық шай мен тәттілер таратамыз. Бұл да адамгершілікті сақтаудың, өзгенің қиындығымен бөлісудің, оларға жан жылуын сыйлаудың бір жолы деп ойлаймын.
Өткен жылы балаларды, өскелең буыңды ізгілікке, мейірімділікке баулитын тәрбиелік мәні терең «Жан» (Душа) атты мултьфильм жарық көрді. Аталған туынды үлкендердің де көзайымына айналып, көрермен қауымның жоғары бағасын алып үлгерді. Сондықтан ұйымның атынан аз қамтылған отбасылардан шыққан балаларға осы мултьфильмның көрсетіліміне билеттер тарту еткен едік.
Жуырда ғана аз қамтылған отбасылардан шыққан оқушыларды қолдауға арналған «Арман ағашы» атты тағы бір жобамыз жүзеге асты. Балалардың арман-тілектері жазылған қағазды сауда орталықтарындағы арман ағаштарына орнаттық. Жақысылық жасағысы келетін кез-келген адам бір тілекті орындау арқылы бір баланың жүзіне қуаныш сыйлай алады. Біз қайырымды адамдардың аманатын тілек иесіне әкеліп береміз.
Сонымен қатар «Jas Otan» жастар қанатының «Қоршаған ортаға қамқорлық жасау» атты бағыты аясында ерікті жастарды, студенттерді ұйымдастырып, сенбіліктерге шығып тұрамыз.
Айта берсек, мұндай акциялар қатары көп. Мәселен, Жеңістің 75 жылдығы қарсаңында, жуырда 1 маусым — Балаларды қорғау күнінде біздің еріктілеріміз азық-түлік пен тәттілер салынған қораптарды үйлерге таратты. Толығырақ Instagram және Facebook әлеуметтік желілеріндегі біздің жеке парақшамыздан көре аласыздар.
— Алда қандай жоспарларыңыз бар?
— Еріктілер қатарын арттыру – біздің бірінші мақсатымыз. Жақында ғана «Біз біргеміз» бірлестігінің кезектен тыс жиналысында «Nur Otan» партиясы төрағасының бірінші орынбасары Бауыржан Байбек волонтерлерге келешекте арнайы аталымдар берілетінін айтты. Үздік волонтерлер енді арнайы аталымдармен, сыйлықтармен марапатталатын болады.
Волонтерлік – тегін жұмыс. Ешкім тегін жұмыс істегісі келмейді. Солай десек те, жастарға қайырымдылықтың адамға бірнеше есе болып қайтып келетінін түсіндіруіміз керек.
Бүгінгі күні «Nur Otan» партиясының орталық филиалына ұсыну үшін халық игілігіне жұмыс істейтін жаңа жобалар әзірлеп жатырмыз.
«Jas Otan» жастар қанаты жастар саясатын дәріптегенімін, түпкі мақсаты — халық игілігіне қызмет ету, елге пайда келтіру. Сондықтан халықтың да біздің қатарымыздан табылғанын, бірге жұмыс істегенін қалаймыз.
— Сұхбатыңызға рақмет! Қызметтеріңізге сәттілік тілейміз!
Сұхбаттасқан Жадыра ТӨЛЕГЕНҚЫЗЫ
