Аптаның демалыс күнінде Семей қаласының зиялы қауым өкілдері, еңбек ардагерлері еліміздің қоғам және саяси қайраткері, «Құрмет» орденінің иегері Тұрсынғазы Жантұяқұлы Мүсәпірбековтың құрметіне ол тұрған үйге арнайы ескерткіш тақта орнатты. Аталмыш шараға қала әкімі Нұрымбет Сақтағанов та арнайы қатысты.
Тоқтала кетсек, Тұрсынғазы Жантұяқұлы еңбек жолын Аягөз, Таскескен аудандарындағы ауыл шаруашылығы саласынан бастап, өмірінің соңына дейін ел қамы үшін еңбек еткен азамат, өр тұлға еді.
Сонымен қатар 1996 – 2011 жылдары Семей қаласы әкімінің орынбасары, бірінші орынбасары лаузымдарын да зор абыроймен атқарып, қаламыздың рухани – мәдени орталық статусын сақтап қалуында елеулі еңбек сіңірді. Көпшілік алдындағы өз сөзінде осы жайында кеңінен айтып өткен Нұрымбет Аманұлы нағыз мемлекеттік қызметкер ретіндегі өр тұлғасына да тоқталып өтті.
Тұрсынғазы Жантұяқұлы өзінің ұйымдастырушылық қабілетінің арқасында Абай ауданының әкімі болып тағайындалғаннан кейін де Абай, Шәкәрім, Мұхтар елінің нарықтың талабына сай көркеюіне үлкен үлес қосты. Осы өңірдің гүлденіп, қарыштап дамуына өлшеусіз үлес қосты.
— «Абайдың сөзі – қазақтың бойтұмары» деп Елбасы айтқандай, иісі қазақтың мақтанышын, жол көрсетер рухани көсемін тудырған киелі өңір өнер мен өлеңнің нағыз бастау бұлағы іспеттес, осынау қасиетті мекенді өмірінің соңғы жылдары басқарған білікті басшы, шебер ұйымдастырушы, тәжірибелі маман Тұрсынғазы Мүсәпірбеков ел есінде мәңгі сақталады, — деп атап өтті өз сөзінде Нұрымбет Аманұлы.
Жиын барысында сонымен қатар, Абай елінің азаматтары мен ақсақалдары, Тұрсынғазы Жантұяқұлымен бірге еңбек еткен байырғы әріптестері де сөз алып жылы лебіз білдірді.
Сонымен қатар, дәл осы күні ҚР еңбек сіңірген қайраткері, қобызшы, дирижер, композитор, ҚР білім беру ісінің үздігі, өскелең ұрпаққа үлгі болған азамат Оразғали Жүнісбекұлы Сейтқазинге арналып ескерткіш тақта орнатылды.
Қастерлі Қарқаралы топырағында дүниеге келген Оразғали Жүнісбекұлы 1974 жылдан бері Семей елінде жемісті еңбек еткен. Қорқыт бабамыздан жеткен қобыз аспабына жан бітіріп, ұлттық дәстүрді жалғастырған халық композиторы, қазақ еліне аты шыққан дәулескер күйшіге айналды.
Жиналған қауым Оразғали Сейтқазиннің музыка салысында өзіндік қолтаңбасын қалдырған дарынды сазгер екендігіне, Семей өңіріндегі мәдени саланың қарыштап дамуына қосқан өзіндік үлесіне тоқталды.
Расында сазгер музыкасының ерекшелігі: ұлттық ән нақышының Еуропаның классикалық музыка иірімдерімен үйлесім тауып, біте қайнасуында. Бұл жайында лебіз білдірген Семей қаласының әкімі Нұрымбет Аманұлы өзіндік ерекше еңбектерімен танылған өнер жұлдызы, ұстаз, профессор, Қазақстанның еңбек сіңірген қайраткері Оразғали Жүнісбекұлының есімі өнер сүйер қауым мен ұлағатты шәкірттерінің есінде мәңгі сақталатынын да айтып өтті.
«СТ» — ақпарат
