Жуырда Шәкәрім атындағы университеттің «Өнер және Музыка» кафедрасының құрметті профессоры, қобызшы, дирижер, композитор, Қазақстанның Еңбек сіңірген қайраткері, Қазақстан Республикасының білім беру ісінің үздігі Оразғали Сейтқазының өмірден өткеніне бір жыл толуына орай аталмыш оқу ордасында «Ертіс өңірінің заманауи музыкалық мәдениеті: Бүгіні мен келешегі» атты республикалық ғылыми – тәжірибелік конференция өтті.
Конференцияда Қазақстан Республикасының еңбек сіңірген қайраткері, Қазақ Ұлттық өнер Университетінің құрметті профессоры Дүйсен Үкібай, Нұр-Сұлтан қаласының мемлекеттік академиялық оркестрінің дирижері Нұрлан Бекенов, Қазақ ССР-ның жоғарғы советінің секретарі Советхан Нұрпейісов сондай-ақ Серік Малаев, Сайлауғазы Ахметов, Айбек Бекбосын сынды белді азаматтар өнер майталманы Оразғали Сейтқазының өмірі мен шығармашылығы жайлы естеліктерімен бөлісті.
Оразғали Жүнісбекұлы көп жылдар бойы Шәкәрім университетінің шаңырағында қазақ халық аспаптары оркестрін басқарған болатын. Осынау жылдары аталмыш ұжым екі мәрте облыстық көркемөнерпаздар байқауының лауреаты, «облыстың ең үздік студенттік оркестрі» атанды. Сонымен қоса О.Жүнісбекұлының жетекшілігімен «Балабақша және мектеп әндері» атты хрестоматиялық оқу құралдары жарық көрді.
Оразғали Сейтқазының тағы бір қыры, ол дарынды композитор ретінде де танымал болған қайраткер. Қазақ халық аспаптары және үрмелі аспаптар оркестрлеріне, хорға жеке аспаптарға арналған шығармалардың, 10 шақты күйлердің, 100-ге тарта әндердің авторы. «Қазақстаным менің» және «Кел, билейік сәулешім» атты екі ән жинағы баспадан жарық көрген. Күйлері мен әндері өңіріміздің кәсіби және әуесқой орындаушыларының репертуарынан берік орын алып, насихатталып жүр.
Сейтқазы Жүнісбекұлының сазгерлік шығармашылығына Қазақстан композиторлар одағының мүшелері — Қазақстанның еңбек сіңірген өнер қайраткері Теміржан Базарбаев, Қазақстанның халық артисі Алтынбек Қоразбаев және өнер зерттеуші Жарқын Шәкәрімдер өте жоғары баға бергенін бір білсе, бірі білмес. Міне енді алдағы уақытта Оразғали Жүнісбекұлының дарындылық қасиеттері, өнер әлеміндегі дара бағыттары дипломдық жұмыстардың, магистрлік диссертацияларының тақырыптарына айналмақ. Осы мақсатта өнер адамының шығармашылығын терең зерттеу резолюциясы қабылданды. Өйткені дарынды тұлғаның еңбек жолы мен шығармашылығы жас ұрпаққа өнеге, қазіргі ұстаздар қауымына үлгі деп білемін, — дейді гуманитарлық экономика факультетінің деканы, педогогика ғылымдарының кандидаты Бақтыгүл Бодауова.
Өнер майталманының шығармашылығына арналған конференция соңында алыстан келген қонақтар мен қатысушыларға кәдесый ретінде автордың жеке кітабы сыйға тартылды. Сондай-ақ С.Жүнісбекұлы өмірінің соңына дейін қызмет атқарған Мұқан Төлебаев атындағы музыкалық колледждің ұйымдастыруымен қалалық мәдениет үйінде еске алу концерті болып өтті. Оразғали Жүнісбекұлының есімі өнер сүйер қауым мен шәкірттерінің есінде мәңгі сақталатыны анық.
Абылай МАҚСҰТБЕК, «Семей таңы».
