Өткен аптада Қазақстан Республикасы Парламенті мәжілісінің депутаты, Қазақстан Республикасы Президентінің жанындағы Ұлттық қоғамдық сенім кеңесінің мүшесі Саиров Ерлан Бияхметұлы Тарбағатай ауданына келіп, карантин талаптарын сақтай отырып аудан активімен және ардагерлермен кездесу өткізді. Кездесуге облыстық мәслихаттың депутаты Қайрат Қожахметов, «Nur Otan» партиясының ШҚО филиалы төрағасының бірінші орынбасары Олег Чугунков және аудандық мәслихаттың хатшысы мен депутаттары, бөлім басшылары, бұқаралық ақпарат құралдарының өкілдері, қоғамдық ұйымдардың жетекшілері қатысты.
Жиында аудан әкімі Асхат Смаилов алғашқы сөз кезегін Парламент мәжілісінің депутаты Ерлан Бияхметұлына берді. Ақсуат жеріне келіп, жұртшылық өкілдерімен кездескеніне қуанышты екенін айтқан халық қалаулысы елімізде жүргізіліп жатқан саяси өзгерістерге кеңінен тоқталды. Атап айтқанда, халық пен биліктің арасындағы байланысты нығайту мақсатында Ұлттық сенім кеңесінің құрылып, жұмыс істеуі; Парламент және мәслихат депутаттарының 70 пайызға жаңаруы; Парламенттік оппозиция құрылғандығы; Парламенттің онлайн жұмыс істеуге көшуі және онлайн қабылдаулар жасауы; депутаттар мен биліктің әлеуметтік желілерді пайдалануға көшуі туралы жан-жақты түсінік берді.
Сонымен қатар Ерлан Саиров жаңадан сайланған Парламент мәжілісінің жарты жылда атқарған жұмыстарын да баяндап шықты. Парламент мәжілісінің сессияларында 85 заң қаралып, оның 45- і сенатқа жіберілгендігі; «Саяси партиялар туралы», «Рейдерлікке қарсы» заң қабылдануы, «Жер кодексі» мен «Еңбек кодексіне» өзгерістер енгізілгендігі сөз болды. Сондай-ақ Ерлан Саиров тиісті министрліктерге 4 маңызды мәселе бойынша өзінің сауал жолдағанына да тоқталды.
Кездесуде ауылдың әлеуметтік мәселелері жөнінде Шығыс Қазақстан облыстық мәслихатының депутаты Қайрат Қожахметов, Қалбатау-Майқапшағай арасындағы жолдың жөнделуі туралы аудандық мәслихаттың хатшысы Асқар Боғырбаев, ауылды жердегі интернет байланысы және мектептер салу мәселелері жөнінде аудандық білім беру бөлімінің басшысы Самал Дауытбаева сұрақтар қойып, қанағаттанарлық жауаптар алды.
Саиров Ерлан Бияхметұлының Ақсуаттағы Абай ескерткішінің алдында ауыл ардагерлерімен кездесуі кезінде де көпшілікті толғандарып жүрген әлеуметтік мәселелер қозғалды. Тарбағатай аудандық ардагерлер кеңесінің төрағасы Дәулет Итбаев, Ақсуат ауылдық ардагерлер алқасының төрағасы Болат Оразғалиев, аудандық әйелдер кеңесінің төрайымы Жұмаш Маханова және басқалары өздерін толғандырып жүрген әлеуметтік мәселелерді айтып, халық қалаулысының жауабын тыңдады. Ардагерлермен болған кездесуде ерекше айтылған мәселелердің бірі – аудан халқының, жолаушылардың арқасына аяздай батып жүрген Қалбатау-Майқапшағай аралық жолының қазіргі жағдайы еді.
Осы өңірдегі халықтың әлеуметтік-экономикалық әл-ауқатын зерделеп, сараптап қайтуды мақсат етіп келген Ерлан Бияхметұлы бұл жердегі ең өзекті мәселелердің бірі — жол жөндеу жұмысындағы олқылықтарға әбден көз жеткізіпті. Өзіне қойылған сұрақтарға түсінік бере келіп халық қалаулысы Қалбатау-Майқапшағай жолын «ҚазАвтоЖол» және Қытайдың «Синь-Синь» компаниялары салып жатқанын айтты. Қытай компаниясы бөлінген жолды салу мерзімін сақтап, жұмысты алдағы жылы тамыз айында бітіруді межелеп отыр екен. Ал Боғас-Қалбатау арасындағы 204 км жолды жөндеуді міндетіне алған «Синь-Синь» компаниясының серіктесі «КазГерСтрой» компаниясы жолшылары қаржылық проблемаға кездесіпті.
-«ҚазАвтоЖол» басшыларымен, мердігерлермен әңгімелестік. Кемшілік компанияның өзінен екен. Олар тағы несие алуға талпынып отырған көрінеді. Несие алса жұмысты жалғастырып, Байбураға дайінгі жолды биыл салып бітірмекші. Ал несие алмаса жолды қысқа дайындауға тура келеді. Бұл жолдың мәселесін Мәжілістегі «Nur Otan» партиясы фракциясы өз бақылауында ұстайды,-дейді Парламент Мәжілісінің депутаты Ерлан Бияхметұлы.
Жиын мен кездесулердің соңында Тарбағатай ауданының әкімі Асхат Смаилов Парламент Мәжілісінің депутаты Ерлан Саировқа ауданымызға келіп, бұқарамен жүздесіп, көпшілікті алаңдатып жүрген проблемалармен жете танысып, оны шеудің жолдары жөнінде ой бөліскені үшін алғыс білдірді.
Хамза СӘТИЕВ
