23 шілде күні ШҚО әкімі Даниал Ахметов Серебрянск қаласына жұмыс сапарымен барды. Сапар барысында аймақ басшысы маңызды әлеуметтік жобалардың іске асу барысымен танысты.
Даниал Кенжетайұлы алдымен жалпы ауданы 5 мың шаршы метрге жуықтайтын дене шынықтыру-сауықтыру кешенінің құрылысын барып көрді. Нысан келесі жылдың бірінші тоқсанында пайдалануға берілмек.
Кешенде жекпе-жек, жеңіл атлетика және ойын спорты түрлерімен айналысуға арналған залдар қарастырылып отыр. Барлық халықаралық стандарттарға сай келетін футбол алаңы мен 400 метрлік 4 жүгіру жолағы да болады.
Даниал Ахметовтің тапсырмасы бойынша Серебрянск әкімдігі қалалық жағажайды талапқа сай етіп қайтадан жасау жобасын дайындап жатыр. Енді Ертістің жағасы қалалықтар демалатын тамаша орынға айналады.
Ал биыл күзде Серебрянск қаласының көп балалы отбасылары қоныс тойын тойламақ. Қалада «Бір қабатты шығыс» жобасы аясында жаңа үйлердің құрылысы аяқталуға жақын. Айта кету керек, бұл үйлерді жергілікті құрылыс компаниясы салып жатыр. Жақын арада дәрігерлер, мұғалімдер, мәдениет қызметкерлері және балалар үйінің түлектері де баспаналы болады. Бұл үшін аудан әкімдігі бұрынғы тігін фабрикасының жатақхана ғимаратын сатып алған. Қазір жөндеу жұмыстарының жобалық-сметалық құжаттары дайындалуда. Екі бөлмелі 40 пәтер дайын күйде тапсырылмақ.
Сондай-ақ бұрынғы Серебрянск бейорганикалық өндіріс зауытының ғимаратын жөндеу жұмыстары басталады. Бірінші қабатта жұмыспен қамтуды үйлестіру және әлеуметтік бағдарламалар басқармасының филиалы, екінші және үшінші қабаттарда үйірмелер, шығармашылық студиялар мен музыка мектебі, төртінші-бесінші қабаттарда спорт секциялары орналасады.
Ғимараттың бірінші қабатындағы концерт залын қалпына келтіру жоспарланып отыр. Осылайша, жаңа мәдени-спорт нысаны тұрғындар игілігіне жұмыс істемек.
— Қалаға жаңа мәдени-спорт нысаны өте қажет. Өйткені тек музыка мектебінде қазірдің өзінде 350 бала оқиды. Бұдан бөлек қаншама шығармашылық топтар бар,- деді Даниал Ахметов.
Серебрянск қаласын абаттандыру жұмыстары жалғаса береді. Өткен жылы жолдар жөнделіп, жылумен қамтамасыз етудің барлық мәселелері шешілді. Педагогтер мен дәрігерлердің тұрғын үй мәселесі де жуық арада шешімін таппақ.
Қаланың тұрғын үй және басқа да әлеуметтік маңызға ие мәселелері облыс әкімі Даниал Ахметовтің тікелей бақылауында.
