25 шілдедегі мәліметтер бойынша, ШҚО-да бір тәулікте 139 адам КВИ жұқтырса, оның 40 жағдайы Семейде анықталды. Стационарларда 224 адам ем қабылдауда. 20 адам ауыр халде жансақтау бөлімінде жатыр.
ШҚО денсаулық сақтау басқармасы басшысының Семей өңірі бойынша орынбасары Думан Берікұлының айтуынша, бүгінгі таңда Семейде 149 мыңнан астам адам КВИ-ға қарсы вакцина алған.
– Коронавирусты жеңудің жалғыз жолы – вакцинация. Вакцина вирустан 92% қорғайды. Семейде 50-ден астам вакцина егу орталықтары, 7 жылжымалы пункт қызмет етуде. Бізде қазір «Спутник V» вакцинасы бар. Вакцинаның бірінші және екінші компоненті арасындағы ұзақтық 21 күнді құрайды, – дейді Думан Берікұлы.
Күн сайын елімізде коронавирустық инфекциямен сырқаттанған 5 мыңнан астам адам анықталуда. ҚР Денсаулық сақтау министрлігінің ресми мәліметтеріне сүйенсек, осы күнге дейін республикада вакцинаның І компонентін 5 145 055 адам, ІІ компонентін 3 264 705 адам алды. Ал ШҚО-да вакцинаның І компонентін 402 136, ІІ компонентін 255 684 адам салдырған.
Айта кетейік, 24 шілде күні Шығыс Қазақстан облысы да «қызыл» аймаққа өтті. «Сары» аймақта тек Түркістан облысы ғана қалды.
