Апта сәрсенбісінде Семей қаласындағы Абай атындағы облыстық кітапханада, ядролық сынақ полигонының жабылғанына 30 жыл толуына орай, «Маңызды шешімдер кезеңі» атты ерекше көрменің салтанатты ашылуы өтті.
ҚР Тұңғыш Президенті — Елбасы кітапханасы мен Шығыс Қазақстан облысы және Семей қаласы әкімдіктерінің қолдауымен ұйымдастырылған шараның ашылу салтанатына Семей қаласының әкімі Бақытжан Байахметов, «Невада – Семей» халықаралық антиядролық қозғалысының өкілдері, қоғам белсенділері, депутаттар мен зиялы қауым өкілдері, жергілікті жұртшылық пен қала қонақтары, сонымен қатар шетелдік және жергілікті БАҚ өкілдері қатысты.
Көпшілік алдында алғашқы болып сөз алған Елбасы кітапханасының директоры Бақытжан Темірболат Семей ядролық сынақ полигонының жабылу мерейтойы Қазақстан Тәуелсіздігінің 30 жылдығымен тұспа-тұс келгенін атап өтіп, ашылып отырған көрменің маңыздылығы жайлы айтты.
— Алашорданың астанасы, Абай, Шәкәрім, Мұхтар Әуезов сынды ұлылардың қасиетті өлкесі атанған Семей жері ХХ ғасырда КСРО-ның негізгі ядролық сынақ алаңына айналды. 40 жылдың ішінде Семей даласында 456 ядролық жарылыс жүргізілді. Полигонның жерімізге, халқымызға тигізген зияны орасан зор. 1991 жылы ҚР Тұңғыш Президенті Н.Ә.Назарбаевтың Жарлығымен полигон жабылды. Бұл семейліктер мен жалпы қазақстандықтар үшін ғана емес, бүкіл адамзат үшін маңызы зор тарихи оқиға болды. ҚР Президенті Қасым-Жомарт Тоқаев ядролық қаруға қарсы бастамаларды ілгерілету және халықаралық қауіпсіздікті нығайту жолындағы Елбасының саясатын жалғастыруда. Мемлекет басшысы 2019 жылдың қыркүйегінде өткен БҰҰ Бас Ассамблеясының 74-сессиясында ядролық қарудан азат әлемге қол жеткізу Қазақстанның негізгі басымдығы болып қала беретінін атап өтті, — деді Бақытжан Темірболат.
Елбасы кітапханасының директоры Абай атындағы Шығыс Қазақстан облыстық әмбебап кітапханасының директоры Гүлнар Жігітбаеваға Елбасы кітапханасы қорындағы ерекше туындыларды жиналған қауым алдында салтанатты түрде тарту етті.
Салтанатты рәсімде Шығыс Қазақстан облысы әкімінің орынбасары Азамат Мұхамедчинов те сөз алып, аймақ басшысы Даниал Кенжетайұлының ізгі тілегі мен құттықтауын жеткізді.
— Адамзатты ядролық қарудан азат етуге және жаппай қырып-жоятын қаруды таратпауға бағытталған Қазақстанның осынау сарабдал саясатын халықаралық қоғамдастық мойындады. Нәтижесінде бұл саладағы еліміздің жаһандық көшбасшылығы нығая түсті. БҰҰ мінберінен, халықаралық форумдарда, сондай-ақ ядролық державалар басшыларымен жеке кездесулерде осы ұстанымдарды түбегейлі және дәйекті түрде қорғаған еліміздің Тұңғыш Президенті Нұрсұлтан Әбішұлы Назарбаевтың ядролық қарудан азат әлем құруға қосқан үлесі ерекше,- деді.
А.Мұхамедчинов аталған көрменің тарихи-танымдық және тәрбиелік мәнін атап өтіп, ҚР Тұңғыш Президенті – Елбасы кітапханасының басшылығына шығысқазақстандықтар үшін маңызы зор шараны ұйымдастырғаны үшін алғыс айтты.
«Невада-Семей» халықаралық антиядролық қозғалысының вице–президенті Сұлтан Картоев пен қоғам қайраткері Зейнолла Тоқаев көрменің лентасын қиғаннан соң, жиналған қауым экспозициялық залға өтті. Экспозициямен ҚР Тұңғыш Президенті — Елбасы кітапханасы директорының орынбасары Күләйша Ақтаева таныстырды.
Үш бөлімнен тұратын бірегей көрмеге көпшілік назарына Қазақстан тарихынан сыр шертетін Елбасы кітапханасы қорындағы архивтік материалдар, құнды жәдігерлер мен кітаптар қойылған.
«Семей қасіреті» бөлімінде Семей ядролық сынақ полигонының қызметімен байланысты материалдар, жарылыстың зардабы туралы жәдігерлер ұсынылған. Ал «Елбасының ядролық қарусыз әлем жолындағы бастамалары» бөлімінде кітапхана, архив, музей қорындағы материалдары негізінде Елбасының ядролық қарудан бас тарту және атомды тек бейбіт мақсаттарда пайдалану жөніндегі халықаралық саммиттерде сөйлеген сөздері, сонымен қатар Ұлыбританияның, Жапонияның, АҚШ-тың және тағы басқа жоғары мемлекеттік наградалары, төсбелгілері қойылған.
«Бейбіт атомға құқық» бөлімінде Елбасының атомды бейбіт мақсатта пайдалану идеясын насихаттау және ядролық технологияларды таратуға қатысты қауіпсіздік шараларын қамтамасыз ету жөніндегі қызметі туралы архив материалдарымен, музей экспонаттарымен және кітаптармен танысуға болады.
Аталмыш көрме ағымдағы жылдың 27 қыркүйегіне дейін жалғасатын болады. Семейліктер мен қала қонақтары үшін есік ашық.
Әлібек КЕМЕЛХАН, «Семей таңы»
