Жуырда облыстық әкімдікте аймақ басшысы Даниал Ахметовтің төрағалығымен облыстағы қалалар мен аудандар әкімдерінің және өңірдің денсаулық сақтау басқармасы басшылығының қатысуымен коронавирустық инфекция мәселесі бойынша кеңейтілген отырыс өтті.
Қазіргі таңда Шығыс Қазақстан облысы эпидемиялық ахуал бойынша бұрынғыдай «сары» аймақта. Яғни қауіп әлі де толықтай сейілген жоқ.
— Бүгінгі күні коронавирустық індетпен аймағымыз бойынша жалпы саны 117 науқас тіркелді, оның басым көпшілігі облыс орталығының тұрғындары. Бұл вирустың Дельта штамының жоғары жұқпалы болуына байланысты, онда бір науқас 10 адамға дейін жұқтыруы мүмкін. Қазір байланыста болған адамдар тобын жедел анықтауға ерекше көңіл бөлу керек, мұндай жұмыс Семей қаласында жақсы жүргізіледі. Мәселен, осы қазан айының бес күні ішінде Семейде індетті жұқтыру көрсеткіші 12,7 %, ал Өскеменде 2,1%-ды құрады. Бұл Семейдің медициналық қызметкерлері мен әкімдігі індеттің алдын алу бойынша елеулі шаралар қабылдап жатқандығын көрсетеді, — деп атап көрсетті аймақ басшысы Даниал Кенжетайұлы.
Жиын барысында күн тақырыбынан түспей тұрған аса өзекті мәселе — вакцинация жайы да кеңінен талқыланды. Даниал Ахметов коронавирусқа қарсы екпе салдырудан ел бойынша өңіріміз жетекші орын алатынын айтып өтіп, бүгінде вакцинаның алғашқы компонентін 770 мыңға жуық адам салдырғанын жеткізді. Ендігі мақсат әлі де болса осы қарқыннан қалмау болып отыр. Себебі облысымыз ұжымдық иммунитет қалыптастыруға таяу аралықта қол жеткізуі тиіс.
— Өкінішке қарай, маған әлеуметтік желілерде науқастарға тиісті көңіл бөлмейтін, өз қызметіне ұқыпсыз қарайтын кейбір дәрігерлердің немқұрайлы жұмысы туралы жиі жазады. Жағдайды талдағаннан кейін Глубокое және Шемонаиха аудандық ауруханаларында, Өскемендегі № 2 емханасында дәрігерлер өз қызметтерінен босатылды. Олардың орнына кәсіби мамандар келуі керек. Біз денсаулық сақтауды дамытуға орасан зор қаражат салып жатырмыз және оның қайтарымын көруге тиіспіз, — деді облыс әкімі.
Қазіргі таңда облысымыздағы ахуал тұрақты болғанымен, салғырттық танытуға болмайды. Жиын барысында аймақ басшысы медицина қызметкерлері мен қалалар, аудандар әкімдеріне бірқатар тапсырмалар жүктеді.
Айтолқын САМАТОВА,
«Семей таңы»
