Шаһар басшысы Бақытжан Байахметов қаланың үздік сәулетшілері мен мүсіншілерін Семейдің сәулеттік келбетін жақсарту мәселелерін талқылауға шақырды. Дөңгелек үстел басында өткен басқосуда қаланың сәулеттік келбетін жақсартуға қатысты жаңа идеялар мен пікірлер ортаға салынды.
Бақытжан Кәкенқажыұлы аталмыш мәселеге қатысты өз пікірін білдіріп өтті.
— Мен оңтайлы сәулет шешімдерін әзірлеу үшін басқа қалалардан мамандарды шақырғым келмейді. Себебі Семейде де еңбегі сіңген, атақты, ең бастысы, талантты, шығармашыл шеберлер аз емес. Сондықтан біз қысқа мерзімді перспективада қай бағытта қозғалатынымызды алдын ала анықтауымыз керек, — деді қала әкімі Бақытжан Кәкенқажыұлы.
Алқалы жиында, негізінен, қалаға кіреберістерді, қандай да бір ландшафтық дизайны мүлдем жоқ жаяу жүргіншілердің жасыл аймақтарын безендіру, қала тұрғындарының демалыс орындарында – Арбат, саябақ аймақтары мен скверлерде, Бейбітшілік аралында архитектуралық формалар орнату мәселелері кеңінен талқыланды.
— Сонымен қатар ғимараттардың қасбеттерін жаңартуға ерекше назар аударылатын болады. Біз үйлердің бірінші қабаттарында орналасқан кәсіпкерлік объектілерін ретке келтіреміз. Коммерциялық объектілер бойынша меншік иелерімен келісілетін сәулеттік шешім әзірленетін болады. Ал ғимараттардың жоғарғы бөлігіндегі қасбеттерді бояу, жарықтандыру және т.б. жұмыстарды біз өзіміз атқарамыз. Нәтижесінде бізде әр үй үшін келісілген нұсқа болады. Бұл, өз кезегінде, қаланың келбетін айтарлықтай өзгертеді, — деді шаһар басшысы.
Сондай-ақ күн тәртібінде тұрған тағы бір өзекті мәселе — Семейдегі тарихи құрылыстарды сақтау және рәсімдеу, кейбір сәулет ескерткіштерін қалпына келтіру жайлы да басқосу барысында сөз болды. Осы орайда жауапты бөлім басшыларына қала әкімі тарапынан тиісті тапсырмалар берілді.
Қаланың сәулеттік стилі бойынша нақты идеялар мен ұсыныстарды әзірлеу мақсатында қала құрылысы кеңесі қайта жаңғыртылатын болды. Бұл таяу болашақтың еншісінде. Дегенмен қала әкімінің бастамасымен оның алғы шарттары қолға алынбақ.
«СТ» — ақпарат
