Апта сейсенбісінде қалалық әкімдіктің мәжіліс залында шаһар басшысы Бақытжан Байахметовтің төрағалығымен кеңес өтті. Аталмыш шараға Семейдегі орта және арнаулы білім беру мекемелері жетекшілері мен орта бизнес субъектілері басшылары, жекелеген мекемелер директорлары, сондай-ақ жергілікті БАҚ өкілдері қатысты.
Жиын барысында сөз алған қала әкімі Бақытжан Кәкенқажыұлы «Көшеге қамқорлық жасау» атты тың жобаны ұсынды. Жоба бойынша қаладағы әр кәсіпорынға немесе мекемеге бір көшеден бекітіліп беріледі. Мекеме өкілдері көшенің тазалығын, абаттандырылуын қадағалауға алады. Жылына бір рет, Қала күніне орай, арнайы комиссия құрылып, балалардың ойын алаңы немесе спорт алаңы салынатын ең әдемі үш көшені анықтайтын болады.
Семей қаласының әкімі Бақытжан Байахметов қала көшелерінде тәртіп пен тазалық, реттілік орнатуға септігін тигізетін «Көшеге қамқорлық жасау» жобасы туралы айтып берді. Айта кетерлігі, бұл жаңа идея емес — бұрындары қолданыста болған. Мәселен, кеңес дәуірінде көшелер іргелі ұйымдарға бекітіліп берілетін, олар қамқорлыққа алған көшелердің тазалығы мен абаттандырылуына жауапты болатын. Соның нәтижесінде үздіктер анықталып, марапаттарға ие болатын.
— Біз алдағы уақытта «Көшені қамқорлыққа алу» жобасын жүзеге асырмақпыз. Осында шақырылған басшылар акцияға қатысуға ниет білдірді, мен бұған қуаныштымын. Жобаның негізгі бағыты — көшені таза ұстау. Әрине, жергілікті атқарушы органдар әкімдіктің бекітілген бөлімдері арқылы да жұмыс істейтін болады. Бізде барлық орталық көшелерге қаражат бөлінеді, бірақ мердігерлік ұйымдар бүкіл қаланы қамти алмайды. Бөлінген қаражатқа көшелердің 30%-дан аспайтын бөлігін ғана қамтуға мүмкіндік бар. Әрине, бұл мемлекеттік органдардың тікелей міндеті екендігі анық. Алайда, менің ойымша, жұртшылықтың бақылауынсыз біз ешқашан жақсы нәтижеге қол жеткізе алмаймыз, — деді қала әкімі Бақытжан Байахметов.
Жиын барысында әкім аппаратының басшысы Сержан Азбергенов жоба қатысушыларына жұмысқа қосымша түрткі болатын «Семей қаласының үздік көшесі» акциясы жайлы атып берді.
Әр ұйымға бекітілген бір көше болады. Ол ұйым немесе мекеме сол көше бойындағы көгалдандыру және жарықтандыру, гүлзарларды орнату, қоқыс пен қарды шығару мәселелері бойынша қаланың коммуналдық қызметтерінің жұмысына бақылау жүргізетін болады. Жалпы, шағын және орта бизнестің әрбір субъектісі өз объектісінен 5 метр радиустағы орынды таза ұстауға міндетті, алайда барлығы бірдей бұл қағиданы ұстанбайды. Ол да бақыланады. Қала күніне орай, комиссия ең таза әрі күтімдегі көшені таңдайды, сол көшеде кейін қандай да бір объекті, яғни балалар алаңы немесе спорт алаңы салынатын болады, — деді Сержан Азбергенов.
Қаладағы №41 мектептің директоры Айгүл Түкенова бұрынғы жобаға екінші өмір сыйлап, қайтадан іске асыруға ден қойғаны үшін әкімге алғысын білдірді. Оның айтуынша, өзі басқаратын ұйым ендігі аралықта мектепке қарасты көшенің тазалығын ұдайы бақылауда ұстайтын болады.
— Біздің мектеп Титов көшесінде орналасқандықтан, осы көше бізге бекітілген. Енді біз нақты жұмыс жүргізетін боламыз. Біздің оқушыларымыз бен ата-аналарымыз үнемі экоакцияларға қатысады, сол себептен де біз көше және аула тазалығына баса көңіл бөліп келеміз. Менің ойымша, қаланың тазалығы патриоттық тәрбиемен де тығыз байланысты, — деді Айгүл Төкенова.
Жиынға қатысқан өзге де мекемелердің басшылары қала әкімінің бастамасын құптайтындықтарын жеткізіп, алдағы уақытта бірлесе әрекет етуге уәде берді.
Әлібек КЕМЕЛХАН,
«Семей таңы»