Қала әкімі Бақытжан Байахметов шаһардағы «Ғаббасов» қазандығының аумағында жиын өткізді. Бұл әкімнің осы қазандыққа алғашқы баруы емес. Осыған дейін де қала басшысы мен әкімдіктің басқа да жауапты тұлғалары қазандықтың түнгі қызметіне бақылау жасаған болатын.
Естеріңізге сала кетсек, Семейдегі 70, 71 және 72-ші кварталдардағы көп қабатты үйлерде жылудың берілмегендігі, тұрғындардың тоңып қалғандығы жайында әлеуметтік желілерде жазылған болатын. Аталмыш мәселе қала әкімінің тікелей араласуымен шешімін тапты.
Қазіргі таңда аталмыш қазандық штаттық режимде жұмыс істеуде. Қалыптасқан проблемалар «ВосТоргСтрой» мердігерлік ұйымының кварталішілік жылу желілерін ауыстыру жұмыстарын уақтылы орындамауына байланысты болып тұр. Сондықтан да салғырттық танытқан бұл ұйымға қолданыстағы заңнамаға сәйкес айыппұл санкциялары қолданылады.
Сонымен қатар қала әкімі «Теплокоммунэнерго» МКК техникалық директоры Н.А.Деминге сөгіс жариялауды және тұрғын үй-коммуналдық шаруашылық және тұрғын үй инспекциясы бөлімінің басшысы А.Өтелбаевқа жоғарыда көрсетілген жұмыстардың орындалу барысына тиісті бақылау жасалмағаны үшін тәртіптік жаза қолдануды тапсырды.
Жылумен жабдықтау объектілерін дайындау бірінші кезектегі міндет болып табылады. Қала әкімінің дәл осылай күш салуымен 70-ші квартал ауданындағы нысандар – алдымен үш үй мен балабақша, екінші күні 6 үй жылуға қосылды. Ал 6 қазанда 72-ші кварталдың қалған нысандарына толықтай жылу берілді.
— Қала тұрғындары суық пәтерлерде отырмауы керек. Жауапты басшылардан объектілерді жылумен жабдықтауға қосу мерзімдерін бұзғаны және тұрғындарымызға қолайсыздықтар келтіргені үшін сұраныс қатаң болады, — деді бұл орайда қала әкімі Бақытжан Байахметов.
Азамат ЕРСАЙЫН,
«Семей таңы»
