Шаһар басшысы Бақытжан Байахметов жуырда қаланың ең көне оқу орындарының бірі Құрылыс колледжіне барып, оқу орнының тыныс-тіршілігімен, ондағы атқарылып жатқан жұмыстармен кеңінен танысты.
Құрылыс секторы өңірдің әлеуметтік-экономикалық дамуының негізгі бағыттарының бірі болып табылады. Қазіргі уақытта қаламызда құрылыс жұмыстары белсенді жүргізілуде. Жаңа тұрғын үйлер салынып, абаттандыру жобалары іске асырылуда. Сонымен қатар әлеуметтік нысандар да бой көтеруде. Сондықтан құрылыс саласына қажетті кадрлар даярлау мәселесі өзектілігін жоймайды.
Құрылыс колледжінің түлектері еңбек нарығында үлкен сұранысқа ие. Оқу орны құрылыс саласында мамандар даярлауда үлкен тәжірибеге ие және жол-механикалық, құрылыс жұмыстарының барлық түрлерін орындау үшін қажетті жабдықтармен қамтамасыз етілген мамандандырылған оқу орны болып табылады. Қала әкімі әсіресе осы мәселеге кеңінен назар аударып, бірқатар жағдайларға қанықты.
Бүгінгі таңда колледжде ғимараттар мен құрылыстарды салу және пайдалану, сәулет, дәнекерлеу ісі, тұрғын үй-коммуналдық шаруашылық объектілерінің инженерлік жүйелерін монтаждау және пайдалану, автомобиль жолдары мен аэродромдар салу және т.б. мамандықтар бойынша 700-ден астам студент білім алуда.
«Колледждің әлеуетін пайдалану мақсатында біз оқу орнының басшылығына тұрғын үй құнының қажетті есептерін ескере отырып, бір пәтерлі тұрғын үйлердің құрылысы бойынша бірнеше жоба дайындауды ұсындық. Табысты болған жағдайда, біз осы жобаларды ілгерілетіп, оларды әзірлеушілерге ұсынамыз. Аталған жоба бойынша колледж басшылығымен бір аптадан кейін кездесеміз», — деп жазды бұл орайда қала әкімі Бақытжан Байахметов өзінің фейсбук әлеуметтік желісіндегі жеке парақшасында.
Өз тілшіміз
