Қазақстан Республикасының Шығыс Қазақстан облысы мен Ресей Федерациясының Алтай аймағы арасындағы екіжақты өңіраралық байланысты нығайтуға бағытталған келісімнің аясында 2014 жылғы 8-9 сәуір күндері Барнаул қаласында Шығыс Қазақстан облысының күндері болып өтті.
Экономикалық, әлеуметтік және мәдени қарым-қатынасты арттыруға бағытталған бұл шараға шығыстан Семей қаласы мен Бес-қарағай, Бородулиха, Көкпекті, Ұлан және Шемонаиха аудандары қатысып, Барнаулдың Сахаров атындағы алаңында Ұлыстың ұлы күні – Наурыз мейрамын тойлау мақсатымен өз отауларын тігіп, мәдениеті мен өнерін көрсетіп, «Достық дастарханынан» жергілікті халыққа дәм таттырды. Ұлттық спорттан жарыстар өткізіліп, сауда жәрмеңкесі ұйымдастырылды.
Жұмыс уақыты болуына қарамастан мереке өткізілер күні Сахаров алаңы адамға толды. Бірін салтанатын құрып тігілген қазақ үйлер қызықтырса, бірі арзан бағамен азық-түліктерін қамдады, енді бірі Ата жұрттың ыстық сәлемін алып келген қаракөз бауырлармен көрісіп, ескі дәстүрмен Наурыз күні бір-біріне игі тілектер тілеп, мәре-сәре болып жатты.
Айта кету керек, Барнаулға барып, киіз үйлерді тігіп, мерекеге басқа да әзірлік жұмыстары барысында ауа райы құбылып, жел тұрды. Ағайынға деген жанашырлық па, әлде, көптен бері көрісе алмағаны болар, әйтеуір келгеннен соң үй иесі ұяладыға салған жергілікті қазақ ағайын да алаңда түтінін будақтатып, самаурын қайнатып қызу дайындықта жүргендерге ыстық шай ұсынып, тоңғандардың бойын жылытты, сағынышын тарқатып, әңгімеге тартты, Қазақстандағы ағайынның жағдайын сұрап ыстық сәлемдерін жолдады.
Барнаулға барған делегациялар қатарында Семейдің орны мен жөні бөлек болды. Ең алдымен, қонақтарды қарсы алып, оларға ұлттық өнердің озық үлгілерін паш ету семейліктерге жүктелді. Сондықтан қаладан Бар-наулға апарған кісінің де, киіз үйлердің де, қазақ ауылының барлық сәні мен салтанатын көрсететін ұлттық жәдігерлер мен дәм-тұздың да саны мен мөлшері көп болды. Сахаров алаңының басым бөлігін алған семейлік киіз үйлер қалашығының бір бұрышында жастар тоғыз-құмалақ ойнап, асық атып, қазақ күресінің қыр-сырымен танысса, енді бір бұрышта барнауыл- дықтар алтыбақан теуіп, «Кербез» фольклорлық ансамблінің өнерімен танысты. Сегіз қанат ақ-боз үйдің іші мен сыртына семейлік қолөнер шеберлері жайғасып, туындыларын көпшілік назарына ұсынды. Темірден түйін түю, сырмақ сырып, ши тоқу, құрақ құрап, ағаш оюдың қыр — сыры таныстырылды.
Бірақ, дүйім жұртты алыстан менмұңдалап өзіне тартқан он алты қанатты ордалы үй еді. Көп киіз үйдің арасынан дараланып тұрған бұл үй ханның тұрағындай барлық сән-салтанатымен киіз үйлер қалашығына көрік беріп тұрды.
{jcomments on}Бәлкім, содан болар, үйге қызығушылық танытып, фотоға түскісі келгендердің саны көп болды.
Түске қарай Сахаров алаңындағы «қазақ ауылына» Алтай аймағының басшысы А.Б.Карлин мен Шығыс қазақстан облысының әкімі Б.М. Сапарбаев бастаған бір топ қонақтар келді. Сыйлы қонақтарды семейліктер «Дәм-тұзымен» қарсы алып, қос тілде «Арнауларын» айтып, ұлттық қолөнер жәдігерлерімен таныстырды.
Артынша қонақтар үлкен үйге кіріп арнайы дайындалған дастарханнан дәм татты. Мұнда оларды Ресей Федерациясының Алтай аймағында тұратын қазақ диаспорасының өкілдері қарсы алып, екі өңірдің басшыларына ақжарма тілектерін айтып, мерекемен құттықтады.
Түстен кейін біздің делегация өкілдері Алтай аймағының әкімшілігінде өткен ресми жиынға қатысып, өңіраралық ынтымақтастық меморандумының орындалу нәтижелерімен танысты.
Шығыс Қазақстанның күндері Алтай аймағының мемлекеттік филармониясында өткен гала-концертпен аяқталды.
Семей қалалық ішкі саясат бөлімінің ақпараттық—насихаттық секторы.
