Семей қаласына ресми іссапармен Қазақстан Республикасындағы Жапонияның Төтенше және Өкілетті Елшісі Джун Ямада мен «Шөп тамыры» бағдарламасының үйлестірушісі Акира Мацумото келді.
Сапардың мақсаты қаламен танысу және Семейдегі мамандандырылған Бала үйі мен нашар көретіндерге арналған №2 мектеп-интернатында Бағдарлама жобасы жұмысының жабылуына қатысу болып табылады. Аталған мекемелерде Бағдарлама бойынша кір жуу орны мен офтальмологиялық жабдық орнатылды.
Сапар барысында мәртебелі қонақтар Абай музейіне және Невзоровтар отбасы атындағы музейіне барды. Елші мырза қазақ халқының ұлы перзенті Абай Құнанбайұлына құрмет көрсетіп, ақын ескерткішіне гүл шоқтарын қойды. Джун Ямада мырзаАбай музейіндегі экспозициялардың бірегейлігін, дәстүрлі шығармашылық пен заманауи үлгідегі безендірудің ерекшелігін атап өтті.
Қонақтарға Невзоровтар отбасы атындағы музей де ерекше әсер сыйлады. Елші мырза атақты суретшілер Куинджи мен Шишкиннің туындыларын тамашалады.
Сапар аясында Жапония делегациясы жедел медициналық жәрдем ауруханасына барды. Семей қаласымен ынтымақтастық орнатудың келесі жобасы ретінде Жапония Үкіметі Семей қаласының Жедел медициналық жәрдем ауруханасына «дабыл түймесін» орнатуды жоспарлауда. Жапония делегациясының сапары жалғасуда.
Жапония Елшісі Джун Ямада мамандандырылған бала үйі мен нашар көретіндерге арналған № 3 мектеп-интернатында да болды. Қонақтар Жапония Үкіметінің «Шөп тамыры» бағдарламасы аясында орнатылған кір жуу цехы мен офтальмологиялық кабинет жабдықтарын көрді.
Джун Ямада мырза мекеме қызметкерлерінің жоғары кәсіби біліктіліктерін, тәрбиеленушілерге деген қамқорлықтарын атап өтіп, ынтымақтастықты жалғастыруға дайын екендіктерін жеткізді. Қонақтар балалардың жан-жақты дамуы мен ұжымның тәрбие жұмысына тәнті болғандарын жеткізді. Сондай-ақ елші мырза қазіргідей жаһандық қауіп-қатер кезеңінде қазақстандық қоғам бейбітшілік пен келісімнің үлгісі саналатынын атап өтті.
«СТ» — ақпарат
