Өткен бейсенбі күні қала әкімі Бақытжан Байахметов әкімдік қызметкерлерінің, қоғам белсенділерінің, үкіметтік емес ұйымдар өкілдерінің қатысуымен Семейдің әлеуметтік-экономикалық дамуы жөнінде кеңес өткізді.
Қала әкімі Бақытжан Байахметов Мемлекет басшысының тапсырмасымен қабылданған Семей қаласын дамытудың 2025 жылға дейінгі кешенді жоспарын жүзеге асыру таяу жылдарға арналған стратегиялық мақсат екенін атап өтіп, бүгінгі күнге дейін атқарылған жұмыстарға тоқталды. Құжатта барлығы 56 түрлі іс-шара жоспарланған. Алайда әр түрлі себептерге байланысты әзірге олардың тек 10-ы ғана жүзеге асырылыпты.
— Жоспарлардың кейбірі жеке инвесторлардың бас тартуы себебінен жүзеге аспай отыр. Сондықтан мұндай жобалар бюджеттен қосымша қаржыландырылуы мүмкін. Кез келген жағдайда бұл нысандар қаламызға қажет,- деген Б.Байахметов облыс әкімі Даниал Кенжетайұлының қолдауымен жаңа әлеуметтік нысандар құрылысын, атап айтқанда Водный және Восход кенттерінде мектептер, балабақшалар салу, жол жөндеуді арттыру жоспарланып отырғанын жеткізді.
Бақытжан Кәкенқажыұлының айтуынша, кешенді даму жоспарын жүзеге асыруға бастапқыда 260 млрд теңге жоспарланса, қазір бұл соманы тағы 180 млрд теңгеге ұлғайту көзделіп отыр.
— Алдағы екі күн ішінде Семейде салалық басқармалар басшыларының қатысуымен комиссия жұмыс істейтін болады. Комиссия жоспарға қосымша түзетулер әзірлеп, барлық қажеттіліктер мен мүмкіндіктерді есептейді. Жұмыс нәтижелерін біз облыс басшысына ұсынамыз,- деді Б.Байахметов.
Келесі күні қала басшысы қалалық әкімдікте Семей қаласының кәсіпкерлерімен кездесіп, Семей қаласын дамытудың кешенді жоспарын іске асыру жолдарын талқылады.
— Кәсіпкерлерсіз әлеуметтік-экономикалық мәселелерді сәтті шешу мүмкін емес. Өкінішке орай, кәсіпкерлік бөлімінің бизнес өкілдерімен жүргізген жұмысы туралы есебін тыңдай отырып, нақтылық жоқ екенін байқадым.
Жаңа жобаларды қолдауға бөлінетін қаражат әлдеқайда көп болуы керек.
Мен өз орынбасарларыма бизнес ортадағы жұмысты күшейтуді, жалтарма жауаптармен айналыспауды тапсырамын,- деді Б.Байахметов.
Қала әкімі жиналған кәсіпкерлерді «Көшелерді қамқорлыққа алу» жобасына белсенді қатысуға, сол арқылы қала көшелерінің жағдайын жақсартуға үлес қосуға шақырды.
— Коммуналдық мекемелер өздеріне тапсырылған учаскелердің барлығына бірдей үлгермейді. Сіздер туған қаламыздың патриоттары ретінде бізге көмектесесіздер деп сенемін,- деді Б.Байахметов.
А.САМАТОВА,
«Семей таңы»
