Семейде ШҚО әкімі Даниал Ахметовтің бастамасымен қолға алынған «Менің аулам» бағдарламасы бойынша қала аулаларын абаттандыру жұмыстары жалғасуда.
Биылғы жылы аула аумақтары мен кварталішілік өтпе жолдарды күрделі жөндеу жұмыстары Шайжүнісов көшесі 103 — Шайжүнісов көшесі 105 — Аманов көшесі 19; Ибраев көшесі 129 – Қозбағаров көшесі 42 – Аманов көшесі 22; Галетто 40, 42, 44 мекенжайлары бойынша 3 ауланы — барлығы 9 көп пәтерлі үйді қамтиды. Бұл аулаларда балалар, спорт алаңдарын орнату, жарықтандыру, жол жиектерін ауыстыру, аулаішілік жолдарды асфальттау, жаңа ағаштар отырғызу жоспарланып отыр. Абаттандыру жұмыстары ағымдағы жылдың желтоқсан айында аяқталады деп күтілуде.
— Тұрғын үйлердің аулаларына ерекше назар аудару керек. Өйткені мұнда балалар, жасөспірімдер мен қарт адамдар бос уақыттарын өткізеді. Келесі 2022 жылы да осы бағытта жұмысты жалғастырып, жоба бойынша 18 аула аумағын абаттандыруды жоспарлап отырмыз,- дейді қала әкімі Б.Байахметов.
Еске сала кетейік, «Менің аулам» бағдарламасы аясында қаламызда 2018 жылы 9 аулаға, 2019 жылы 1 аулаға жөндеу жұмыстары жүргізіліп, 7 тұрғын үйдің аумағы, 2020 жылы Абай Құнанбаевтың 175 жылдық мерейтойы аясында 32 тұрғын үйді қамтыған 9 аула абаттандырылды.
Әлібек КЕМЕЛХАН,
«Семей таңы»
