Семейдегі ақпарат орталығында ТҮКШ бөлімінің басшысы Амантай Өтелбаевтың қатысуымен баспасөз конференциясы өтті.
Бөлім басшысы шаһарды жылумен қамту жайында толық мағлұмат беріп, жылыту маусымына даярлық шаралары, көмір қоры және су желілерін жаңартуға қатысты бірқатар мәселелерге тоқталды. Сонымен қатар қаланың жылу көздеріндегі жөндеу жұмыстары, абаттандыру жайлы да айтты.
Амантай Өтелбаевтың айтуынша, қазіргі уақытта Семей қаласы бойынша қазандықтар үшін де, жеке сектор тұрғындары үшін де отын қоры жеткілікті деңгейде. Биыл халықтың қатты отынға қажеттілігін қамтамасыз ету мақсатында 260 мың тонна көмір жеткізу жоспарланған. Көмір жеткізуді «Жігер» және «Семей көмір» ЖШС жүзеге асырып жатыр. Сондай-ақ сатылымда сұрыпты көмір бар. Көлікпен жеткізу қызметін қоса есептегенде, көмірдің құны тоннасына 12 000 мың теңгеден басталады екен.
— Бүгінгі таңда «Орталық», «103», «103А», «Ғаббасов», «35 квартал» қазандықтары бойынша жылу жүйесінің гидравликалық режиміне реттеу жұмыстары жүргізілуде. Ол үшін «Теплосервис» ЖШС-мен келісім жасалған. Жұмыстар ағымдағы жылдың мамырында басталды, – деді Амантай Өтелбаев.
Сонымен қатар бөлім басшысы көше жарықтарын жаңғырту жұмыстарына да тоқталды. Семейдің 136 көшесінде 7 659 шамды ауыстыру жоспарланған. Бүгінгі таңда олардың 5700-і ауыстырылған. Жұмысты осы жылдың 30 қарашасына дейін аяқтау жоспарланып отыр. Сонымен қатар Семей қаласы әкімінің тапсырмасы бойынша жобаға қосымша 32 көшені қосу туралы шешім қабылданған. Аталған көшелерде 978 шам орнатылады. Бұл жұмыстардың барлығы 11 желтоқсанда аяқталуға тиіс.
— Семей қаласын сапалы көше жарықтарымен қамтамасыз ету мақсатында қала әкімінің тапсырмасы бойынша көше жарықтарын жаңғырту жобасының екінші фазасы қарастырылды. Қазіргі уақытта 2022 жылдан 2023 жылғы дейінгі кезеңде тиісті инфрақұрылымды жаңғырту үшін 100-ден астам көшенің тізімдерін қалыптастыру жұмыстары жүргізілуде. Бүгінгі таңда Жобаның екінші фазасына қосу үшін 17 көше бойынша ақаулы акт жасалды, – деді ТҮКШ бөлімінің басшысы.
Сонымен қатар баспасөз мәслихатында қала маңын дамыту жөніндегі іс-шара жоспары және «Халық шаруашылығы бюджеті» жобасы шеңберінде Восход және Суық бастау кенттерінде балалар және спорттық алаңдарын салу жайлы да айтылды.
Бөлім басшысы сонымен қатар қалада қазіргі уақытта 450 контейнерді дайындау және орнату жұмыстары жүргізіліп жатқанын жеткізді. Ағымдағы жылдың 30 қазанына дейін қаладағы ықшам аудандарда контейнерлер мен алаңдар орнатылатын болады.
Жиын барысында бөлім басшысы Амантай Өтелбаев БАҚ өкілдері қойған бірқатар сауалдарға жауап қайырды.
Азамат ЕРСАЙЫН,
«Семей таңы»
