15 қазан күні Тұңғыш Президент қорының директоры, ҚР Парламенті Мәжілісінің депутаты Дариға Нұрсұлтанқызы Назарбаева облыс орталығы Өскемен қаласына келіп, бірқатар әлеуметтік нысандарды аралады.
Дариға Назарбаева өткен жылы Өскемен қаласында Ана мен бала орталығының базасында ашылған «Қамқорлық» балаларды оңалту орталығында болды. Ең заманауи және тиімді құралдармен жабдықталған орталықта әр түрлі физикалық және неврологиялық ауытқулары бар балалар емделіп, оқытылады. Орталықтың 29 маманы білімдерін кәсіби түрде жетілдірген. Нәтижелер көп күттірген жоқ. Көптеген балалар мұндағы сабақтардан кейін өз бетінше жүріп, сөйлей бастады. Облыс әкімі Даниал Ахметов жыл соңында 3-тен 18 жасқа дейінгі балаларға арналған осындай екі орталық Семей қаласында да ашылатынын мәлімдеді. Себебі ауытқулардың кейбір түрлерін туғаннан бастап емдеу өте маңызды. Дариға Нұрсұлтанқызы сондай-ақ Ана мен бала орталығының операциялық бөлімшесімен танысты. Мұнда, қажет болған жағдайда, бала туғаннан кейін бірден хирургиялық оталар жасалады.
Сапар барысында Мәжіліс депутаты облыстық көпбейінді онкология және хирургия орталығына да барды. Мекеме желілік үдеткіш, 128 бөлікке арналған компьютерлік томограф сынды еліміздегі ең үздік медициналық техникалармен жабдықталған. Жөндеу жұмыстары мәресіне жеткен соң пациенттерді қабылдауға әзір.
Айта кетейік, Тұңғыш Президент қорының бастамасымен елімізде «Ел Үміті» жобасы аясында ұлттық білім беру жүйесін дамытуға бағытталған «Мың бала» ұлттық олимпиадасы, «Елбасы медалі» байқауы және «Qabilet» қызметі іске асырылуда. Жұмыс сапары аясында Дариға Нұрсұлтанқызы №48 мектептегі «Qabilet» қызметінің жұмысымен танысты. Мұнда оқушылар салаға икемділігін (гуманитарлық, математикалық немесе химия-жаратылыстану бойынша) анықтайтын тестілеуден өте алады. Сапар барысында Дариға Нұрсұлтанқызы Елбасы медалінің иегерлерімен және «Мың бала» І Ұлттық олимпиадасының жеңімпаздарымен әңгімелесті. Оқушылар қол жеткізген жетістіктері, болашаққа деген жоспарлары туралы айтып, сұрақтарын қойды.
Дариға Нұрсұлтанқызы оқушыларды жетістіктерімен құттықтап, оларға үлкен сенім білдірді. Кездесу соңында Д.Назарбаева мен облыс әкімі Д.Ахметов «Елбасы медалі» жобасының қола жүлдегерлеріне медальдарын табыс етті.
Дариға Нұрсұлтанқызы сонымен қатар Елбасының «Қамқорлық» бастамасын іске асыру аясында қордың қолдауымен Мұхтар Әуезов атындағы №17 мектепте ашылған инклюзивті білім беру кабинетін көрді. Тәжірибе көрсеткендей, мұнда бір жыл білім алғаннан кейін балалар қарапайым мектептерге орала алады. Біліктілікті арттыру курстарынан өткен педагогтер инклюзивті білім беру әрбір мектепте қолжетімді болуы үшін өз тәжірибелерімен бөлісуге дайын екендерін айтуда.
Дариға Нұрсұлтанқызы мұндағы білім алушылармен бірге күзгі композиция құрауға қатысып, кабинет мамандарымен және оқушылардың ата-аналарымен әңгімелесті. Ата-аналар білім алуға осындай мүмкіндіктер жасағаны үшін ризашылықтарын білдірді.
Инклюзивті білім беру кабинетінің ашылу салтанатына қатысқан тұңғыш оқушы Дэни Быков Дариға Нұрсұлтанқызына Қазақстан Республикасының Тәуелсіздік күніне арналған композициясын сыйға тартты.
Кездесу соңында Дариға Нұрсұлтанқызы ата-аналарға, ұстаздарға табыс тілеп, осы қол жеткізген нәтижелермен тоқтап қалмауды, қолда бар әдістемелерді жетілдіруді тапсырды.
Мәжіліс депутаты іссапары соңында Тұңғыш Президент Қорының бастамасымен ашылған әлеуметтік нысандардың жұмысына оң бағасын берді.
Айтолқын САМАТОВА,
«Семей таңы»
