Өткен демалыс күндері қала көшелерінде жалпықалалық сенбілік өткізілді. Бұл — саябақтарда, жаяу жүргіншілер жолында, аулаларда тазалықты сақтауға бағытталған қоғамдық пайдалы іс-шара.
Сенбілікке мыңнан астам адам шықты. Барлығы 15 көше тазаланды. Семей қаласы әкімінің орынбасары Дмитрий Гариковтің айтуынша, мұғалімдерді сенбілікке шығаруға ешкім нұсқау берген жоқ. Бұл ерікті, ұжымдық жұмыс және әр адамның жеке таңдауы.
— Сенбілік өткізу туралы хат меншік нысанына қарамастан барлық ұйымдарға жіберілді, өйткені мұндай іс-шараларды өткізер алдында әрдайым және барлық жерде осылай жасалады. «Келу міндетті» деген және «бұл күні сабақ өткізілмесін» деген сөздер болған жоқ», — деді Дмитрий Гариков.
Семей қаласының білім бөлімінің басшысы Наталия Фесенконың айтуынша, сенбі күні қаланың барлық 17 мектебінде сабақ өткізілді. Оның ішінде № 43-ші мектепте де сабақтар онлайн режимінде өткізілді. Мұндай шешімді осы оқу орнының директоры демалыста болғандықтан орынбасары қабылдаған.
«Кейбір БАҚ сенбілік туралы ақпаратты дұрыс берген жоқ. Бұл көптеген адамдарды адастырды. Тағы да атап өтейін: сенбілікке қатысу үшін бірде-бір сабақ тоқтатылған жоқ. Оқу процесі жоспарлы режимде өтті», — деді Наталия Фесенко БАҚ өкілдеріне берген сұхбатында.
Бұл күндері Семейде тұрақсыз ауа райы күтілуде. Коммуналдық қызметтер көшелер мен аумақтарды тазалауға 200-ге жуық адам мен 27 бірлік техниканы жұмылдырады. Бірақ жел мен жапырақтардың түсуі жұмысты одан әрі қиындатады. Мұндай ауа райы жағдайында кез келген көмек пайдалы. Аула ішіндегі аумақтар ерекше күтімді қажет етеді. Тұрғындар өз күшімен іргелес аумақты тазартуды ұйымдастыра алады. Бірақ бұл мәселеде пәтер иелерінің кооперативтері белсенді емес.
Жалпы, семейліктер туған қаласын абаттандыруға өз еркімен қатысса, құба-құп болар еді.
Әрине, сенбілікке қатысу-қатыспау әр адамның өз еркінде. Десек те тек бәріміз жұмыла кіріскенде ғана біз өз қаламыздың тазалығын сақтай аламыз.
Өз тілшіміз
