Өткен аптада ШҚО аймақтық коммуникациялар қызметінде Семей қаласындағы эпидемиологиялық ахуалды талдауға арналған баспасөз мәслихаты өтті.
Баспасөз мәслихатына Семей қаласы әкімінің орынбасары Айдар Садырбаев, Семей қалалық санитарлық-эпидемиологиялық бақылау басқармасының басшысы Берік Тілебалдин, қалалық білім бөлімінің басшысы Наталия Фесенко қатысты.
Жиында айтылғандай, қазіргі күні Семейде эпидемиологиялық ахуал тұрақты. Коронавирустық инфекцияны жұқтыру көрсеткіші тамыз — қыркүйек айларымен салыстырғанда біршама төмендеген. Бірақ арқаны кеңге салуға болмайды, әлі де болса санитарлық қауіпсіздік шараларын қатаң сақтау керек.
Қалалық білім бөлімінің басшысы Наталия Фесенконың айтуынша, Семей мектептері қалыпты жұмыс істеуде. Санитарлық талаптардың сақталуына қатаң бақылау жасалып отыр. Егер бір оқушының коронавирус жұқтырғаны анықталса, бүкіл сынып балалары қашықтан оқуға көшіріледі.
Білім бөлімінің басшысы қыркүйек айында Семей «қызыл» аймақта болғандықтан, балалардың денсаулығын қорғау мақсатында оқушыларды тасымалдау үшін мектептерден 29 автобус және қала әкімдігінің автомобиль жолдары және жолаушылар көлігі бөлімі тарапынан 25 автобус бөлінгенін еске салып өтіп, қазіргі күні өңіріміз «сары» аймаққа өткендіктен, 25 автобус 18 қазаннан бастап кері қайтарылатынын жеткізді. Ал 29 автобус оқушыларды тасымалдауды жалғастыра бермек.
Баспасөз мәслихатында, жалпы, Семейдегі эпидемиологиялық жағдай тұрақты екені айтылды. Вакцинация науқаны белсенді түрде жүргізіліп жатыр. Бүгінге дейін 213 мың қала тұрғыны екпе салдырған.
Ұзақбек АТАНБАЕВ,
«Семей таңы»