Семей қаласында 195 көшені жөндеуге 3135,724 млн теңге бөлінді. Бұл туралы Аймақтық коммуникациялар қызметінде өткен баспасөз мәслихатында Семей қаласының Көлік және автомобиль жолдары бөлімі басшысының міндетін атқарушы Ерлан Уәлиев мәлім етті.
— Бүгінгі таңда қаланың 30 көшесінің 37,4 шақырымын орташа жөндеуге 2553,481 млн теңге бөлінді. 27 көшеде орташа жөндеу жұмыстары аяқталып, қалған үшеуіндегі жұмыстар 30 қазанға дейін тамамдалмақ. Мердігерлер — «Облшығысжол» ЖШС және «Гордорстрой»ЖШС. Жалпы ауданы 95500 шаршы метр болатын қаланың 25 көшесінде жұмыстар аяқталды, — деді Ерлан Уәлиев.
Сонымен қатар мердігер мекеме «Облшығысжол» ЖШС 97,642 млн теңге көлеміндегі қаржыға 12 оң бұрылысты орнатып жатыр. Қазіргі уақытта жұмыстар аяқталуға жақын.
— Қаланың 45 көшесін және жергілікті маңызы бар жолдарды ағымдағы жөндеуге 187,500 млн теңге бөлініп, жұмыстар толық орындалды.
61 көшенің жөнделуіне қосымша 100,00 млн теңге қаражат бөлінді. Қаланың 58 көшесінде жөндеу жұмыстары жүргізілді, — деді Ерлан Уәлиев.
Келесі жылға 5274,6 млн теңге сомасына қаланың 221 көшесін жөндеу жұмыстарды жоспарланған. Сондай-ақ Өскемен көшесін, Шайжүнісов көшесінен 6 — Линия көшесіне дейін 1122,6 млн теңге көлеміндегі қаржыға жөндеуден өткізу жоспарлануда.
Қазіргі уақытта қаланың 35 көшесінде жұмыстар аяқталуға жақын. Мердігер мекеме — «ОблШығысЖол» ЖШС.
Биылғы жылы қала көшелерін грейдерлеуге жергілікті бюджеттен 200 млн теңгеден астам қаражат бөлінген.
— Қазіргі таңда Семей көшелеріне қиыршық тастар төселіп, профильдеу жұмыстары жүргізілуде. Комсомол және Ұшақтар кенттеріндегі көшелерде жұмыс жүргізу қарастырылған. Ол жерлерде қазіргі уақыттта қиыршық тастармен және құм қоспасымен тегістеу жұмыстары жүргізіліп жатыр. Тағы 15-16 көшені грейдерлеу қарастырылуда. Тұрғын үй алабынан асфальт магистралына дейінгі жолдарға қиыршық тастар төсеп, тегістеуге тырысамыз. Тұрғындардың арыздары мен өтініштерін де қарастырамыз, – деді Семей қаласының жолаушылар көлігі және автомобиль жолдары бөлімінің бас маманы Жасар Түсіпов.
Естеріңізге сала кетейік, барлық жолдарды қамту мүмкін болмауына байланысты, алдағы жылға жөндеуді қажет ететін көшелердің тізімі жасалуда.
Азамат ЕРСАЙЫН,
«Семей таңы»
