Семей қаласында көшені жарықтандыруды жаңғыртудың екінші кезеңіне дайындық жұмыстары басталды.
Осы ретте «Семей қаласында көшені жарықтандыру жүйесін жаңғырту» жобасы аясындағы жұмыстарға тоқталып көрейік. Жобаның жалпы құны — 1,85 млрд теңге. Атқарылуға тиісті жұмыстың көлеміне келсек, 136 көшеге 7 659 шам, 687 тірек, 2,6 мың кронштейн, 130 шақырым оқшауланған сым кабелін ауыстыру және 196 басқару шкафын орнату жоспарланған болатын. Бүгінде жұмыстың 80 пайызы аяқталды. Қаланың 120 көшесі жарықтанды. Сөз бен істің арасында алшақтық болмаса, қолға алған шаруаның нәтижелі жүзеге асатынын айтып жату да қажет емес.
Осы ретте жоспарланған жұмыстарға толығырақ тоқталып өткеніміз артық болмас.
Жыл соңына дейін жарық шамдары мүлдем жоқ қосымша 50 көше жарықтандырылады деп жоспарлануда. Көшені жарықтандырумен қамтуды ұлғайту үшін жобаның резервтік сомалары есебінен «Everlight» компаниясымен жасалған қолданыстағы келісімшартты кеңейту шеңберінде 2022 жылы қосымша іс-шараларды іске асыру туралы мәселе пысықталуда.
Қала әкімі Бақытжан Байахметов түрлі саланың жауапты қызметкерлерімен бірге бірнеше күн бойы Семейдің ондаған көшелерін аралады. Көшелердің жай-күйі, үйлердің саны, онда тұратын тұрғындардың шамамен алғандағы саны, мектептерге кірмежолдар мұқият зерделенді. Жедел кеңес өткізіліп, қаланың 2 шағын ауданын толық қамтитын 50-ден астам көшенің қосымша тізімі анықталды. Жарықтандыру орнатуға арналған тізімге Матяша, Ильяшев, Автономная, Ақкөл, Зайсан, Курчатов, Радищев көшелері, Комсомол кенті және таткрай, казкрай аталып кеткен аудандар, Шығыс және Затон аудандарындағы көшелер кірді.
Көшелердің жалпы ұзындығы 80 шақырымнан астам қашықтықты құрайды. Осы аралыққа 2 мың жарық диодты шамдарды монтаждау, оқшауланған сым тарту жұмыстары жүргізіліп, тіректер мен басқару шкафтары орнатылмақ. Аталған жұмыстардың болжамды құны 616 млн теңгені құрайды.
Сондай-ақ қазіргі уақытта Еуропа қайта құру және даму банкінің қосымша кредиттік қаражатын және бюджеттік қоса қаржыландыруды тарта отырып, 2023-2024 жылдар аралығында жобаның 2-кезеңін іске асыру бойынша ұсыныстар әзірленуде.
Шығыс Қазақстан облысының әкімі Даниал Ахметов Ұлыбританияның астанасы Лондонда осы жоба бойынша табысты келіссөздер жүргізді. Жобаның осы кезеңі аясында 8 мың шам орнату жоспарлануда, осылайша, Семей қаласының көшелерін жарықтандыру жүйесін толық жаңғырту аяқталады деп күтілуде.
Ұ.КЕҢЕСҰЛЫ,
«Семей таңы»
