Апта ішінде Семей қаласының әкімі Бақытжан Байахметов шаһардағы Галето көшесіндегі аулаларды абаттандыру жұмыстарының барысымен танысты. Қазіргі уақытта мердігер компания «Шығыс Сапа» №40, №42 және №44 үйлердің аулаларында қызу жұмыс жүргізуде.
Бұл аулаларды шөп басып, шіріген ағаштарға толып кеткен. Ондаған жылдар бойы жиналған қоқыс есебінен жол учаскелерінің беттері тегіс болмай, көктем мезгілінде және жаңбырдан кейін бұл жерлерде үлкен шұңқырлар пайда болады. Тұрғындар пәтерлеріне жету үшін қоқыстардың үстінен жүруге мәжбүр болып келді.
Мердігер ұйымның басшысы Нұртөлеу Досымхановтың айтуынша, жұмыс басталғаннан бері ауладан 50-60-қа жуық көлік қоқыс шығарылды.
Қазір жиектастарды орнату және тастөсеніштер салу жұмыстары жүргізілуде. Сонымен қатар құрылысшылардың жеке бригадасы спорт және балалар алаңдарына бетон-негіз құяды. Аға буын өкілдерінің таза ауада демалуы үшін үстел мен орындықтары бар жабық шатырлар орнатылады.
Сондай-ақ киім мен кілемдерді кептіруге арналған алаңдар қарастырылған. Бұл аулаларды абаттандырудың соңғы шаралары – ағаш отырғызу және жарықтандыру жұмыстары. Жалпы, 20 түп шырша, тау күлі мен терек отырғызылады.
Қала әкімі Бақытжан Байахметов мердігер компанияның басшысына жұмыс қарқынын қазіргіден де жеделдетуді тапсырды. Бүгінгі уақытта 10 маманнан тұратын қосымша бригада тарту туралы шешім қабылданды.
Ауа райы жағдайына байланысты жұмыстардың аяқталу мерзімі осы жылдың қараша айының соңы деп белгіленіп отыр.
Қала әкімі тұрғындардың сұрақтарына да жауап берді. Әкім келесі жылы Галето (Карменов көшесінен Рысқұлов көшесіне дейін) көшесін орташа жөндеу жоспарланғанын жеткізді. Келесі жазда аталған көше жаңа асфальт төселген, заманауи жарықтандырылған кең көшеге айналады.
Жадыра ТӨЛЕГЕНҚЫЗЫ,
«Семей таңы»
