Семей қаласында қатты тұрмыстық қалдықтарды шығарумен сегіз сервистік компания жеке және заңды тұлғалармен жасалған келісім шарттар негізінде айналысады. Онда тараптардың қоқысты шығару төлемі мен шығару кестесі бойынша тиісті міндеттемелері айқындалған.
Бүгінгі таңда бұл кәсіпорындар 1400-ден астам көп пәтерлі тұрғын үйлерге және 8500 шамасындағы жеке сектордағы үйлерге, сондай-ақ 4284 заңды тұлғаларға қызмет көрсетеді.
Жақында сервистік компаниялар ұжымдарының бірі, атап айтсақ, «Семей Тазалық» ЖШС жұмысшылары жалақының төмендігіне шағым жасап, жұмысқа барудан бас тартты. Коммуналдық қызмет өкілдері бұл жайтты белгіленген тарифтің төмендігімен түсіндіруге тырысқан.
Тұрмыстық қалдықтарды жинау, әкету, қайта өңдеу және жою үшін қолданыстағы тариф абаттандырылған үйлерге 190 теңгені, абаттандырылмаған үй иелеріне айына бір тұрғыннан 346 теңгені құрайды.
Шынында да, ағымдағы тариф республикадағы ең төмен тарифтердің бірі болып табылады. Осы орайда қала әкімі жаңа тарифтерді жедел есептеу туралы тапсырма берді. Қатты тұрмыстық қалдықтарды жинау, көму, сұрыптау әрі кәдеге жарату тарифтерін әзірлеу бойынша жұмыс тобы құрылды. Тарифтерді әзірлеуде тәжірибесі бар «Ерай Сервис» ЖШС сараптама ұйымының өкілдері шақырылды.
Сонымен қатар, тұрмыстық қалдықтарды жинақтау нормалары мен тарифін бірлесіп әзірлеу үшін Семей қаласының ТКШ және тұрғын үй-коммуналдық шаруашылық бөлімі атынан уәкілетті орган мен қоқыс шығарушы ұйымдар арасында өзара келісімге қол қойылды. Тарифтер мен жинақтау нормаларын 10 желтоқсанға дейін бекіту жоспарлануда.
Ал, «Семей Тазалық» ЖШС бойынша орын алған мәселеге келетін болсақ, бұл жұмыс беруші, яғни серіктестік пен қызметкерлер арасындағы азаматтық-құқықтық жауапкершілік. Сонымен қатар, ЖШС қала тұрғындарымен жеке шарттар жасасқанын ұмытпау ләзім. Соңғылары қоқыс шығарушы компания шарттық міндеттемелерін уақтылы және сапасыз орындағаны үшін құқық қорғау органдарына жүгіне алады.
— Өз кезегінде, біз тұрғындарға аулалар мен іргелес аумақтарда қатты тұрмыстық қалдықтардың жиналып қалуын болдырмау мақсатында қоқыс шығаруға тартылған басқа да сервистік компанияларды ұсынуға дайынбыз. Қалай болғанда да, қаланы қоқыс басып кетпейді, — деді бұл орайда қала әкімінің орынбасары Димитрий Гариков.
Сонымен қатар, Семей қаласының кейбір тұрғындары «Семей Тазалық» ЖШС-нің өз міндеттеріне адал қарамауына байланысты құқық қорғау органдарына және СЭС-ке жүгінуге ниетті.
Өз тілшіміз
