Бүгінгі таңда Семей қаласы бойынша санитарлық тазалық мәселесі өзекті болып тұр. Бұл орайда шаһардағы қоқыс шығару, нақтырақ айтқанда тұрмыстық қалдықтарды жинайтын контейнерлерді жаңарту бойынша ауқымды жұмыстар жүргізілуде. Аталмыш шаралардың барлығы да жергілікті атқарушы биліктің назарында тұр.
Осынау орайда қала әкімі Бақытжан Байахметов қоқыстарды шығару үшін дайындалған контейнерлердің сапасын арнайы түрде тексерді. «Саланг құрылыс» компаниясында бүгінде бүйірден тиеуге арналған 400 контейнер дайындалған болатын. Олардың әрқайсысының құны шамамен 40 мың теңгені құрайды.
Жүргізілген тексерулер барысында қалалық әкімдік өкілдері контейнерлердің дөңгелектерінің диаметрі мен беріктігі оның көлеміне сәйкес келмейтіндігін байқады. Егер контейнердің салмағын 110 кг болса және оған 30-50 кг қоқыс қосылатынын ескеретін болсақ, онда бұл контейнерлердің дөңгелектері пайдаланудың алғашқы күндерінде жарамсыз болары анық. Сондықтан да, қала әкімі Бақытжан Кәкенқажыұлы барлық жасалатын бұйымдарды техникалық құжаттамаға сәйкес жасауды тапсырды. Яғни, жүргізілетін жұмыс кезінде тиісті стандарттар сақталуы керек.
Бүгінгі таңда жалпы, қала бойынша контейнерлерге деген қажеттілік шамамен 4000 дананы құрайды. Яғни, қоқыс жинайтын контейнерлердің жетіспеушілігін көп ұзатпай шешу керек деген сөз. Жыл соңына дейін тағы 500-ден астам контейнер дайындау жоспарлануда. Болашақта оларды өндіруге қосымша қаражат табу қажет.
— Қалада қоқыс шығару үшін 40 бүйірлік жүк машинасы және қоқысты артынан тиеуге арналған тағы төрт машина бар. Егер бізде контейнерлер жетіспесе, онда бұл техниканың көп бөлігі тоқтап қалады, — деп атап өтті қала әкімі.
Бір бұл емес, сонымен қатар, контейнерлерді қалыпты түрде тиеу үшін арнайы алаңдарды жабдықтау қажет. Мұндай алаңдардың көлемі қызмет көрсетілетін үйлердің және онда тұратын тұрғындардың санынан есептелуі тиіс. Контейнерлердің қажетті саны осындай алаңдарда еркін орналастырылуы міндетті. Жүргізілген тексерулер барысында қала әкімі жауапты тұлғаларға аталмыш бағытта нақты тапсырмалар берді.
Сөз соңында айта кетсек, қазіргі таңда қаламыздың көптеген бөліктеріндегі қоқыс жинайтын ескірген темір жәшіктер ауыстырылып жатыр. Оның орнына тасымалға ыңғайлы, заманауи контейнерлер қойылуда. Бұл өз кезегінде тазалық шараларын ойдағыдай жүргізумен қатар, аулалардың көріктілігіне де септігін тигізеді.
«СТ» — ақпарат
