«Бір қабатты Шығыс»
29 желтоқсан күні облыс әкімі Даниал Ахметов жұмыс сапарымен Аягөз ауданында болды. «Бір қабатты Шығыс» бағдарламасы аясында салынған 20 үйдің кілттерін табыстап, студенттер жатақханасының салтанатты ашылу рәсіміне қатысты.
Жаңа пәтерлер көп балалы аналарға, мұғалімдер мен дәрігерлерге берілді. Айта кету керек, бүгінде Аягөз ауданы осы бағдарламаны жүзеге асыру бойынша көш басында тұр. Өңірде бағдарлама аясында барлығы 182 үй салынған. Тұрғын үйлер бой көтерген Жаңа ауыл деп аталатын аудан барлық қажетті коммуникациялармен жабдықталып, жолдар салынып, жарықтандыру қосылған. Жаңа баспаналар көп балалы аналар комиссиясының пікіріне сай бөлінгенін де атап айтқан жөн. Комиссия бірінші кезекте пәтерге мұқтаж адамдарды анықтады.
— Бүгін Аягөз ауданында қос бірдей қуаныш. Мереке қарсаңында көп балалы отбасылар мен жас мамандар пәтер кілттеріне ие болып, қоныс тойын тойлауда. Сонымен қатар студенттерге арналған жатақхананың құрылысы аяқталып, пайдалануға беріліп отыр. Облысымызда 2020 жылы көп балалы 1049 отбасы пәтерге ие болса, биыл 1125 пәтер берілетінін және осы бағыттағы жұмыстар жалғасатынын атап өткім келеді. Баспанаға ие болған отбасыларды және аудан тұрғындарын келе жатқан Жаңа жылмен құттықтап, денсаулық, бейбітшілік, бақыт, амандық және барлық бастамаларыңызға сәттілік тілеймін!- деді баспаналы болып жатқан ағайынның қуанышына ортақтасуға келген Даниал Ахметов.
Бір жылдың ішінде салынған студенттер жатақханасы тау-кен металлургиясы және басқа да өнеркәсіп салалары, соның ішінде Ақтоғай КБК саласында мамандар даярлайтын политехникалық колледж студенттеріне арналған. Жатақханада тұрмысқа қажетті барлық жағдай жасалған, спорт залы да қамтылған. Сонымен қатар ерекше қажеттіліктері бар студенттерге арналған бөлмелері бар.
Аудан тұрғындары өздеріне көрсетіліп жатқан қамқорлық үшін Мемлекет басшысына және облыс әкімі Даниал Ахметовке алғыстарын білдірді.
Аймақ басшысы Даниал Ахметов сондай-ақ Серебрянск қаласына жұмыс сапарымен барып, «Бір қабатты Шығыс» бағдарламасы аясында баспанаға ие болған Құмархан отбасын құттықтады.
Облыс әкімі қаланың әлеуметтік-экономикалық дамуымен танысып, шаһар басшысына тапсырмалар берді.
Айтолқын САМАТОВА,
«Семей таңы»
