Мәслихат сессиясы
Өткен аптада Семей қаласы мәслихатының кезекті, 20-шы сессиясы өтті. Депутаттар Семей қаласы мен ауылдық округтердің 2022-2024 жылдарға арналған бюджетін қарады. Сессия жұмысына 19 депутат қатысты.
Семей қаласы бюджетінің көлемі жоғары тұрған бюджеттерден берілетін трансферттер мен кредиттерді ескере отырып, 50 418 299 мың теңгені құрайды, оның ішінде қалалық бюджет – 37 484 996 мың теңге, трансферттер мен кредиттер – 12 933 303 мың теңге.
2022 жылға арналған бюджеттің шығыс бөлігінде инфляция коэффициентін (4-5 %) ескере отырып, жалақыны төлеу, коммуналдық қызметтерді төлеу, әлеуметтік төлемдер және басқа да шығыстар толық көлемде қарастырылған.
Жалпы, бюджеттік қаржыландыру есебінен тұрғын үйлер салу және оларға инженерлік желілер тарту, Шығыс кенті мен Шақаман ауылының су құбыры желілерін қайта жаңарту және кеңейту көзделген. Сонымен қатар қала жолдарын жөндеу, оң жақ бұрылыстар орнату, білім беру объектілеріне кіреберіс жолдарды және Семей — Талица автожолын жөндеу жұмыстары жүргізілетін болады.
14 аула аумағы абаттандырылып, қалалық мал қорымы салынады.
Сондай-ақ, қаланың шет аймақтарын дамытуға ерекше көңіл бөлінді. 16 балалар, спорт және көп функционалды алаңдарды орнату жоспарланған.
Қайнар ауылын әлеуметтік-экономикалық дамытудың кешенді жоспары бойынша дене шынықтыру-сауықтыру кешені салынады, ауыл жолдарына ағымдағы жөндеу жүргізіледі.
«Ауыл — Ел бесігі» бағдарламасы аясында Мұқыр және Мұрат ауылдарына кіреберіс жолдар жөнделеді.
Барлық қаржыландыру көздері есебінен әлеуметтік көмек пен әлеуметтік қамсыздандыруға, оның ішінде еңбек нарығын дамытуға; мүгедектердің құқықтарын қамтамасыз ету және өмір сүру сапасын жақсарту жөніндегі іс-шаралар жоспарын іске асыруға; атаулы әлеуметтік көмек төлеуге; жергілікті өкілді органдардың шешімдері бойынша мұқтаж азаматтардың жекелеген санаттарына әлеуметтік көмек көрсетуге; тұрғын үй көмегін көрсетуге; азаматтардың жекелеген санаттарына қалалық қоғамдық көлікте жеңілдікпен, тегін жол жүру түрінде әлеуметтік қолдау көрсетуге; арнаулы әлеуметтік қызмет көрсету орталығында 65 жастан асқан зейнеткерлердің бос уақытын ұйымдастыру үшін белсенді ұзақ өмір сүру бөлімшесін қамтамасыз етуге 6 360 900 мың теңге қарастырылған.
Ауылдық жерлерге келетін болсақ, Абыралы ауылдық округінде балалар ойын алаңы салынады. Ақбұлақ, Жиенәлі және Новобаженово ауылдарында көше жарығы орнатылады. Алғабас ауылында бұрынғы интернат ғимараты жөнделеді. Көкентауда сумен жабдықтау жұмыстары жүргізіледі. Талица және Жарқын ауылдарында көше жарықтарына ағымдағы жөндеу жүргізіледі.
Мәслихат депутаттары Семей қаласы мен ауылдық округтердің 2022-2024 жылдарға арналған бюджетін бір ауыздан қолдады.
Сессияда сонымен қатар Семей өңірін оңалту жөніндегі БҰҰ Бас Ассамблеясының 2020 жылғы 22 желтоқсандағы қарарының іске асырылуы туралы хабарлама тыңдалды. Сондай-ақ мәслихаттың атқарған жұмыстары мен оның тұрақты комиссияларының қызметі туралы есеп бекітілді.
Қазақстан Республикасы Тәуелсіздігінің 30 жылдығына орай, халық қалаулылары Дариға Даирова мен Әміржан Ахмеджанов Қазақстан Республикасы Парламенті Сенаты Төрағасының Құрмет грамотасымен, Айнұр Арғынбекова алғыс хатымен марапатталды.
Семей қалалық ішкі саясат бөлімі
