Семей
Семей қаласының әкімі Бақытжан Байахметов азаматтарды жеке сұрақтары бойынша қабылдады.
Шаһар басшысының қабылдауына жазылған тұрғындар әлеуметтік мәселелерін жеткізді. Атап айтсақ, Ольга Сергеева Нұр-Сұлтан қаласында тексеруден өтуге тиіс 15 жасар ұлы Тимофей Сироткиннің жағдайы туралы айтты. Оттегінің, витаминдердің жетіспеушілігі диагнозы қойылған баласын астанаға апаруға, қалада жүріп-тұруға көп балалы отбасының қаражаты жетпейді. Сондықтан қала басшысынан көмек сұрап келіптті.
Бақытжан Байахметов Ольга Сергееваға өз қаражатынан көмек көрсетіп, бөлім басшыларына қосымша қаржылық қолдау жасау мүмкіндіктерін іздестіруді ұсынды.
Әкімнің жеке қабылдауына тағы бір көп балалы ана келді. Бақыт Бұланбаева баспана алуға өтініш берген. 2017 жылдың 25 қазанынан бастап «Көп балалы отбасы» санаты бойынша 33-ші болып кезекте тұр. Бұған дейін ол осы мәселесі бойынша жергілікті атқарушы органға жүгінген. Бұл отбасыға, тұрғын үймен қамтамасыз етудің кезектілік тәртібіне сәйкес, Ұшақтар кентінен сатып алу шарты бойынша салынған жеке тұрғын үй ұсынылған. Бірақ бөлмелердегі ылғалдылық пен құрылыстағы кейбір ақауларды байқаған көп балалы отбасы бұл ұсыныстан бас тартып, басқа баспана сұраған.
Жеке қабылдауда Бақыт Бұланбаеваға «Бір қабатты Шығыс» бағдарламасы бойынша Комсомол кентінде салынған баспананы қарастыру ұсынылды. Егер бұл ұсыныс та оған ұнамаса, онда ол Қарағайлы ықшам ауданындағы тұрғын үйге кезек күтуге тура келеді.
Тұрғын үй алу мәселесі бойынша Семейдің Мансұр Жомартов есімді азаматы да жүгінді. Оның отбасында үш бала бар. 2015 жылдың 25 тамызынан бастап «жетім балалар» санаты бойынша 1003 болып кезекте тұр. Бұған дейін аталған отбасы отбасылық жатақханадан баспана алудан бас тартқан.
Азамат Машраб Жазид «Семей қаласының Құрметті азаматы» атағын беру туралы мәселені көтерді.
Осы мәселе бойынша ол қаланың бұрынғы әкімі мен облыс басшысына да жүгінді. Алайда, бұл мәселе қала әкімінің өкімімен емес, мәслихат депутатының дауыс беруі негізінде шешіледі. Әр жолы Машраб Жазид депутаттардың жеткілікті дауысын жинай алмады.
Жолаушылар көлігінің қанағаттанарлықсыз жұмысы және автобустардағы төлем карточкалық жүйесіне оралу бойынша Кенжебек Сұлтанбеков жүгінді. Сондай-ақ, ол қаланы абаттандыруға, жолдарды жөндеуге, қаланың экологиясын жақсартуға бюджет қаражатының жұмсалуын сұрады. Оның сұрақтарына толық жауаптар берілді.
Салтанат Өміржанова биылғы жылдың 13 қазанында «Нұр Отан» партиясы арқылы қала әкімінің қабылдауында болды. Ол 2 жас мал сатып алуға көмек сұрады. Бұл мәселе демеушілік қаражат есебінен оң шешімін тапты.
Жеке қабылдау барысында қала әкімі әрбір сауалға жан-жақты түсіндірме берді. Қосымша уақытты қажет ететін мәселелер бойынша тиісті бөлімдерге оларды шешу бойынша шаралар қабылдау туралы тапсырмалар берілді.
Семей қалалық ішкі саясат бөлімі