Семей
Қараңғыда жолдың нашар көрінуі және көлік жүргізушілердің жылдамдық режимін сақтамауы жол-көлік оқиғаларына әкеп соқтырып жатады. Жарығы жоқ көшелерде жаяу жүргіншілерді көлік қағып кеткен жағдайлар да кездеседі. Сондықтан да тұрғындардың қауіпсіздігі үшін көшелердің жарықтандырылуы аса маңызды.
Бүгінгі күндері Семей қаласында көшелерді жарықтандыру жұмыстары жалғасуда. Өткен аптада Морозов көшесіндегі жарықтандыру жұмыстары аяқталды. Жол полициясы бекетінен Мичурин көшесіндегі өткелге дейінгі ұзындығы 3 шақырым болатын көше түгелдей жарықтандыруға қосылып, барлығы 97 тірек, 97 кронштейн және 145 шам орнатылды.
— Мен бұл көшені үнемі тексеріп, жұмыс барысын бақылауда ұстадым. Бұрын бұл көшеде ешқашан жарық болмаған. Морозов көшесі өте кең екенін ескере отырып, біз шамдар бекітілген кронштейндердің биіктігін екі жарым метрге көтердік. Нәтижесінде осындай биіктіктен көше біркелкі жарықтандырылады, жарық сәулелері көбірек кеңістікті қамтиды», — деді Семей қаласының әкімі тұрғындардың бастамашыл тобымен кездесуінде.
Кездесуде тұрғындар тарапынан Семей қаласының әкіміне алғыс та айтылды, басқа мәселелер де сөз болды. Мәселен, Восточная көшесі Морозов көшесімен іргелес. Ұзындығы бойынша кішкентай болғанымен, көше бойында ең ірі жергілікті орта арнаулы оқу орындарының бірі Электротехникалық колледж орналасқан. Мұнда студенттер көп оқиды, сабақтан кейін олар үйге қараңғыда қайтады.
— Мен сіздерді өте жақсы түсінемін. Бұл ата-аналарға көп алаңдаушылық тудырады, себебі аталған көшеде Электротехникалық колледж орналасқан, сабақтан балалар үйге кеш оралады. Жақын арада біз бұл көшені де жарықтандыруға тырысамыз, бұл көп шығынды қажет етпейді. Ол үшін 5 тірек, кронштейн және шамдарды орнату қажет,- деді қала әкімі Бақытжан Байахметов.
Сондай-ақ тұрғындар әкімнен бірнеше іргелес жолдарды жөндеуден өткізуге өтініш жасады. Олардың айтуынша, көктем мен күзде бұл көшелерді батпақ басып, соның салдарынан әлеуметтік қызметтер, соның ішінде жедел жәрдем көліктері үйлеріне дейін жете алмайды.
Сондай-ақ қала тұрғындары бір-бірінен алшақ жатқан аялдамалар туралы да айтып, әкімнен көмек сұрады. Кездесуге қатысушылар үйлерінен алыс орналасқан су құдықтарының жетіспеушілігін де атап өтті.
Бақытжан Байахметов барлық айтылған мәселелерді ағымдағы және алдағы жылға арналған жоспарлар тізіміне енгізуге уәде берді.
Айта кетейік, әкімнің тапсырмасымен тиісті мамандар тұрғындар тарапынан айтылған өтініштердің бірін орындауға кірісіп те кетті: Восточная көшесінде орналасқан Электротехникалық колледждің алдында жарықтандыру жұмыстары жүргізіліп жатыр.
