Спорт
Семей қаласы әкімінің шақыруымен шаһарымызға футзалдан Қазақстан ұлттық құрамасының бас бапкері Паулу Рикарду Фигейра Силва келді. Онымен бірге қаламызға Қазақстан құрамасының футболшылары, Қазақстан чемпиондары, Қазақстан Суперкубогының иегерлері, футзалдан Чемпиондар лигасының күміс жүлдегерлері — Аягөз қаласының тумалары Біржан Оразов пен Дәурен Тұрсағұлов келді.
Айта кетерлігі, соңғы өткен әлем чемпионатында құрамамыздың үштен бірі Аягөз спорт мектебінің өкілдері болды, ал Дәурен Тұрсағұлов әлем чемпионатының үздік ойыншысы деп танылды.
Мәртебелі қонақ ретінде футзалдан мамандар ұстаханасы саналатын Алматы энергетика және электрондық технологиялар колледжінің директоры Төлеуғали Тайтулеев келді. Колледждің 15 тәрбиеленушісі Қазақстан чемпионатында суперлигада өнер көрсетеді.
Кездесу барысында Семей қаласының әкімі Бақытжан Байахметов қазақстандық спортшылардың әлем чемпионатындағы жоғары жетістіктерін атап өтті. Онда футзалдан құрама командамыз жартылай финалға дейін жетіп, Португалия, Бразилия, Аргентина құрамаларымен бірге әлемнің үздік төрттігіне енді.
— Сіздерді қасиетті жер – Қазақстан футболының отаны Семей қаласында қарсы алғаныма қуаныштымын. Біз барлық футбол инфрақұрылымын сақтап қалдық. Семей – өзіндік спорттық дәстүрлері бар қала. Облыс әкімі Даниал Ахметовтің қолдауының арқасында мұнда «Арена» спорттық кешені салынып, жұмыс істеп тұр. Қала тұрғындары арасында өте танымал бірегей кешенде көптеген адам спортпен шұғылданады, бір жарым мыңнан астам бала футбол, волейбол, баскетбол, синхронды жүзу, әр түрлі жекпе-жек түрлерінен спорт секцияларына барады, — деп қонақтарды қарсы алған қала басшысы Бақытжан Байахметов шаһардың спорттық өмірі қысқаша баяндап берді.
Семей қаласының әкімі қонақтарды Семей футболының жетістіктерімен де таныстырды. Тәуелсіздіктің алғашқы жылдарында 3 рет Қазақстан чемпионы атанған «Елім-ай» футбол клубы құрылды. Бүгінде қалада жастардың да, кәсіпкерлердің де футболды жандандыруға деген құлшынысы зор. Ал қазір бюджеттен тыс балалар футбол клубы мен кәсіби клуб құру мүмкіндігі талқыланып жатыр.
— Спорттағы жеңістер халықты біріктіреді. Футзал Қазақстанға да, Семейге де қажет. Мен Сізге кез келген уақытта футбол және футзал туралы сұрақтарды қарастыруға және насихаттауға көмектесуге дайынмын. Мен Қазақстанда үш жарым жыл болдым, осы уақыт ішінде бір жаңа команда құрылды, енді, міне, Семейде пайда болады. Бұл Қазақстандағы осы спорт түрінің одан әрі дамуына үлкен серпін береді, — деді Футзалдан Қазақстан құрамасының бас бапкері Рикарду Кака.
— Сіздің елімізді аралауыңыз спортты дамытуда өте пайдалы. Сіздермен бірге әлемнің ең үздік 10 футзалистерінің қатарына кіретін біздің футболшылар келді, оларды футбол ойнайтын балаларымыз көре алады, бұл үлкен маңызға ие, өйткені ел құрамасы — бұл халықтық команда және халық өзінің ең үздік спортшыларын білуі тиіс, — деді Бақытжан Байахметов.
Қонақтарға қала әкімі мен спорт қауымдастығы атынан естелік сыйлықтар табыс етілді. Паулу Рикарду Фигейра Силва иығына жабылған қазақтың ұлттық шапанын ризашылықпен қабылдап, Еуропа чемпионатында Қазақстан жеңіске жетсе, марапаттау рәсіміне киіп баратынын айтты.
Семей қаласының депутаттық корпусы атынан мәслихат депутаттары Әсемхан Досқожанов пен Серік Байғабылов қонақтарға алғыстарын білдірді. Олардың айтуынша, біздің құраманың өткен әлем чемпионатындағы жеңістері Қазақстан футболының дамуына үлкен серпін берді, футболдан тыс ел үшін төртінші орын — өте жоғары әрі лайықты нәтиже.
Алматы энергетика және электронды технологиялар колледжінің директоры Төлеуғали Тайтулеев колледждер арасындағы Қазақстан чемпионатының финалын 2022 жылы Семейде өткізуді ұсынды. Бұл ұсынысты қала әкімі қолдады.
Одан кейін қонақтар «Арена» кешені және Жақсылық Үшкемпіров атындағы спорт кешенін аралады. Меймандар спорт ғимараттарының инфрақұрылымына жоғары баға беріп, мұнда ірі жарыстарды ең жоғары деңгейде өткізуге болатынына көз жеткізді.
Семей қалалық ішкі саясат бөлімі
