Тәуелсіздік күні қарсаңында түркі әлемінің бесігі саналатын Түркістан қаласында хан Абылайдың бас қолбасшысы болған Қабанбай батырдың ескерткіші жаңартылып, халық көп жиналатын тоғыз жолдың торабына қайтадан орнатылды. Екінші бір ел рухын көтерген шара — «Қаз дауысты Қазыбек би: тұлға және тарих» тақырыбында ғылыми конференция өтті. Конференция аясында тарихи тұлғаның алып ескерткіші салтанатты түрде ашылып, ас берілді.
Қазақтан шыққан тұңғыш ғарышкер, Халық қаһарманы Тоқтар Әубәкіров айтулы шараға арнайы келіп, тұғыры биік Түркістан халқының қуанышына ортақтасты. Нұр-Сұлтан, Қарағанды және еліміздің барлық өңірлерінен зиялы қауым өкілдері, кәсіпкерлер, ғалымдар, ел ақсақалдары, мемлекет қайраткерлері қатысқан рухани шараға «Абыралы — Дегелең» қорының жетекшісі, меценат Марат Құрманбай бастаған ел азаматтары — белгілі ғалым Ғалымқайыр Мұтанов, Болатбек Нәсенов және тағы да басқа жерлестеріміз барып қайтты. Сөз орайында айта кетейік, осыдан біраз уақыт бұрын Түркістан қаласындағы «Қаз дауысты Қазыбек би» қорының төрағасы Пернетай Досыбеков Марат Серікжанұлына хабарласып, қаржылай қолдау көрсетуді өтінген болатын.
«Жұмыла көтерген жүк жеңіл» дегендей, «Абыралы — Дегелең» қоғамдық қорының құрылтайшылары Марат Құрманбай, Сүлеймен Медеуов, Тасболат Битенов, Бекен Альпиев, Алмас Баяхметов, Роллан Серіков, Сәтбек Ракишев, Серікжан Айкелов, Жанарбек Мауқаев, Мұрат Оспанов, Әнуарбек Бимурзин, Асқар Ширяев өз үлестерін қосып, елдік мүдде тұрғысынан келешек ұрпаққа өнеге болатын игі бастамаға қолдау көрсетті. Бұл — ел Тәуелсіздігінің 30 жылдығындағы айшықты оқиға.
Қаз дауысты Қазыбек би жастайынан ел басқару ісіне араласып, өзінің батыл, әділ шешімдерімен, шешендік өнерімен әлеуметтік-саяси өмірге белсене араласып, халық қолдауына ие болғаны белгілі. Қазақ мемлекеттілігінің қалыптасуындағы тарихи тұлғаны ұлықтау елдің рухын көтеріп, болашақтың бағдарын айқындайды.
Ел мерейі асқақтаған күнде игілікті бастаманы қолдаған «Абыралы — Дегелең» қорының президенті Марат Құрманбайға Түркістан облысының әкімі Өмірзақ Шөкеевтің алғыс хаты табысталды.
«Абыралы — Дегелең» қоры республикалық деңгейдегі әлеуметтік, мәдени жобаларға тұрақты қолдау көрсетіп келеді.
Роллан КЕМЕРБАЙ,
Семей қаласы
