Шығыс Қазақстан облысында Тәуелсіздік күнінде 50 сәби жарық дүние есігін ашты.
ШҚО Денсаулық сақтау басқармасы баспасөз қызметінің мәліметіне сүйенсек, Тәуелсіздік күнінде өмірге келген 50 сәбидің басым бөлігі қыздар екен.
Нәрестелер желтоқсанның 16-сы күні Өскемен, Семей шаһарларындағы перинаталдық орталықтарда, Аягөз, Зайсан, Алтай қалалық және Көкпекті, Бородулиха аудандық ауруханаларында өмірге келді.
— Үлкен отбасымызда бұл күн енді ерекше тойланатын болады. Себебі кішкентайымыз дәл осы қастерлі мерекеде дүниеге келіп отыр. Еліміз аман, жұртымыз тыныш, аспанымыз ашық болсын! — деді мерекелік тілек білдірген аналардың бірі.
Мерейтой құрметіне орай облысымызда 99 нәрестеге «Сүйінші» сыйқорабы тарту етілді.
«Азаматтарға арналған үкімет» мемлекеттік корпорациясы ШҚО филиалының мәліметіне сүйенсек, 16-17 желтоқсан күндері жарық дүние есігін ашқан 99 нәрестеге Тәуелсіздіктің 30 жылдық мерейтойына орай baby-бокстар сыйға тартылды.
Онда бөбектерге қажетті заттардан басқа, ҚР Президенті Қасым-Жомарт Тоқаевтың құттықтау тілегі жазылған ашық хат, «Тәуелсіз Қазақстанға 30 жыл» монетасы мен баланың тууы туралы куәлігі салынған.
«Айналайын, бөбек! Сенің туған күнің еліміздің ең басты мерекесімен тұспа-тұс келді. Өзің дүние есігін ашқан кезде халқымыз қастерлі Тәуелсіздігінің 30 жылдығын атап өтіп жатты. Саған бақытты әрі ұзақ ғұмыр тілеймін!» — деп жазылған екен Президенттің құттықтау хатында.
Нәрестелердің туу туралы куәліктеріне өтінімдерді «Азаматтарға арналған үкімет» МК қызметкерлері қабылдап, АХАЖ органдарына жолдаған.
«Тәуелсіздік күні туған сәбилердің ата-аналары, мерекенің 30 жылдығына орай, «Сүйінші» сыйқораптарын алды. Өңір бойынша мереке күндері 99 бала дүниеге келді. Сәбилердің туу туралы куәліктерін рәсімдеген АХАТ қызметкерлеріне, сыйқораптарды жеткізген Қазпошта қызметкерлеріне және барлық медицина қызметкерлеріне қажырлы еңбектері үшін алғыс айтқым келеді», — деді «Азаматтарға арналған үкімет» МК ШҚО филиалының директоры Азамат Есембулов.
16 желтоқсанда облыста дүниеге келген алғашқы сәбидің есімін Әміре деп қойыпты.
— Біздің үшінші баламыз 16 желтоқсанға қараған түні жарық дүние есігін ашты. Ұйымдастырушыларға көңіл бөліп, құттықтағандары үшін көп рақмет, — деп алғысын білдірді сәбидің анасы Ақерке Болатова.
Айта кету керек, облыста жыл сайын перинаталды сала дами түсуде, сәбилер мен аналарға жақсы жағдайлар жасалып келеді. Бұл өз кезегінде туу көрсеткіштеріне де оң әсер етуде. Осы жылдың басынан бері аймақ бойынша 22 000-нан астам сәби дүниеге келген.
Өз тілшіміз
