Өткен аптада Nur Otan партиясы Шығыс Қазақстан облыстық филиалында Тәуелсіздіктің 30 жылдық мерейтойына арналған салтанатты жиын өтті.
Мерекелік шараға қатысушыларды Nur Otan партиясы Шығыс Қазақстан облыстық филиалы төрағасының бірінші орынбасары О.Чугунков Тәуелсіздіктің 30 жылдығымен құттықтап, аймағымыз бойынша партия бастамаларының табысты жүзеге асырылуына және партияның қоғамдық-саяси жұмысына белсенді атсалысып жүрген бірқатар азаматтарға алғыс хаттар табыстады.
— Қадірлі жерлестер, құрметті партияластар. Сіздерді бәріміз үшін орны ерекше ұлттық мереке — қасиетті де қастерлі Қазақстан Республикасы Тәуелсіздігінің 30 жылдық мерейтойымен шын жүректен құттықтаймын! Тарих үшін аз ғана уақытта Қазақстан биік шыңдарды бағындыра білді. Бүгінде тәуелсіз Қазақстан өзгелермен терезесі тең, абыройы асқақ мемлекеттердің қатарында. Тұңғыш Президент – Елбасы Нұрсұлтан Назарбаев «Тәуелсіздік тағылымы» атты мақаласында: «Тәуелсіздік те бақыт сияқты, бағалаған адамның, аялаған қоғамның қолына тұрақтайды. Халқы тату, экономикасы қуатты, саяси жүйесі тұрақты, мәртебесі биік, абыройы асқақ Қазақстанның болашағы кешегіден кемел, бүгінгіден нұрлы екендігіне кәміл сенемін»,- деп жазды. Ендеше, Тәуелсіздігіміз баянды болсын. Баршаңызға зор денсаулық, қызметтеріңізде табыс тілеймін, — деді Nur Otan партиясы Шығыс Қазақстан облыстық филиалы төрағасының бірінші орынбасары О.Чугунков.
Қазақстан Республикасы Тәуелсіздігінің 30 жылдығы қарсаңында Nur Otan партиясының Семей филиалында да салтанатты жиын өтті. Партияның қалалық филиалының төрағасы, Семей қаласының әкімі Бақытжан Байахметов бастауында Nur Otan партиясы болған тәуелсіз Қазақстанның жетістіктеріне ерекше тоқталды.
— Біз, қазақстандықтар, ұлт дамуының қазақстандық дәуірінің негізін қалаушылары және алғашқы ізашарлары болдық! Біздің жолымыз — бірлік пен келісім жолы. Көпэтностығымыз — біздің ортақ қазынамыз. Ел тәуелсіздігі – халқымыздың өз алдына дербес мемлекет болуы, бабалар арманының орындалуы, ата-әжелеріміздің қайғысыз көңілі, балаларымыздың риясыз күлкісі, тұтас елдің береке-бірлігі, тыныштығы!»- деп атап өтті Бақытжан Байахметов.
Шара барысында Nur Otan партиясының белсенділері мен ардагерлері марапатталды. «Қазақстан Тәуелсіздігіне 30 жыл» мерекелік медалімен Nur Otan партиясы Семей қалалық филиалы төрағасының бірінші орынбасарының міндетін атқарушы Майра Құржықаева, «Халық алғысы» төсбелгісімен Nur Otan партиясы фракциясының Семей қалалық мәслихатының депутаты, бастауыш партия ұйымының төрағасы Съезбек Ахметов, «Белсенді қызметі үшін» төсбелгісімен Nur Otan партиясы фракциясының Семей қалалық мәслихатының депутаты, бастауыш партия ұйымының төрайымы Жанат Молдағалиева, сондай-ақ Nur Otan партиясы Төрағасының бірінші орынбасары Б.К.Байбектің Құрмет грамотасымен партия ардагері Владимир Халин мен бастауыш партия ұйымының төрағасы, Nur Otan партиясы фракциясының Семей қалалық мәслихатының депутаты Андрей Алтайбаев марапатталды. Ардагерлерге, партия белсенділеріне және еріктілерге Nur Otan партиясының Шығыс Қазақстан облыстық филиалы атынан Семей қаласы әкімінің алғыс хаттары мен Құрмет грамоталары табыс етілді.
Айта кетсек, Семейде Nur Otan партиясының 7472 мүшесі бар. Биыл партия қатарына 123 студент және 419 зейнеткер қабылданды.
Өз тілшіміз
